වසර 36ක් රාජ්‍ය පරිපාලන සේවයේ අත්දැකීම් කැටිකර ගනිමින් හිටපු ජ්‍යෙෂ්ඨ රාජ්‍ය නිලධාරියකු වන රවීන්ද්‍ර හේවාවිතාරණ මහතා රචනා කළ ‘ඇවිද මිනිසුන් අතර’ ග්‍රන්ථය අනිද්දා (25දා) කොළඹ 07, පිලිප් ගුණවර්ධන මාවතේ ක්‍රීඩා අමාත්‍යාංශ ශ්‍රවණාගාරයේදී ජනගත කෙරේ.
මහර, නැලිගම සංඝමිත්තා කනිෂ්ඨ විද්‍යාලයෙන් සහ කොළඹ ආනන්ද විද්‍යාලයෙන් මූලික අධ්‍යාපනය ලද ඒ මහතා කැලණිය විශ්වවිද්‍යාලයේ උපාධිධාරියෙකි. 1987දී රාජ්‍ය පරිපාලන සේවයට එක්වූ හේවාපතිරණ මහතා 1988 සිට කොළොන්නාව හා 1994 සිට ඕපනායක ප්‍රාදේශීය ලේකම් ලෙස කටයුතු කර ඇත. පසුව සමෘද්ධි අධිකාරියේ අධ්‍යක්ෂවරයකු ලෙස සහ අධ්‍යක්ෂ ජනරාල් ලෙස කටයුතු කර ඇත. එසේම ඔහු ග්‍රාම සංවර්ධන හා පර්යේෂණ අභ්‍යාස ආයතනයේ අධ්‍යක්ෂ ලෙස ද ගොවිජන සේවා කොමසාරිස් ජනරාල් ලෙස ද ගාල්ල මහ දිසාපති ලෙස ද කටයුතු කර ඇති අතර අනතුරුව රාජ්‍ය ව්‍යවසාය සංවර්ධන අමාත්‍යාංශය සහ වැවිලි කර්මාන්ත අමාත්‍යාංශ ලේකම්වරයා ලෙස ද කටයුතු කර ඇත.
මෙම ග්‍රන්ථය පිළිබඳ සංවාද කතිකාවට ප්‍රවීණ ලේඛක චූලානන්ද සමරනායක, රාජ්‍ය පරිපාලන සේවයේ ජ්‍යෙෂ්ඨයකු වන සුදත් රණුග්ගේ හා කථිකාචාර්ය ධම්ම දිසානායක යන මහත්වරු එක්වෙති.
චමින්ද සිල්වා
