ඔස්කාර් සහ එමි සම්මානවලින් පිදුම් ලත්, සුප්‍රකට හොලිවුඩ් නළුවකු වූ බි්‍රතාන්‍ය ජාතික ජෙරමි අයන්ස් මෙරට රූ ගත කෙරෙන චිත්‍රපටයකට දායක වීම සඳහා රාත්‍රියේදී කටුනායක ගුවන් තොටුපොළ වෙත පැමිණියේය.
වසර 12කට පසුව, හොලිවුඩ් නළුවකු මේ ආකාරයට මෙරටට පැමිණීම සිදු වී ඇති බව ශ්‍රී ලංකා සංචාරක ප්‍රවර්ධන කාර්යාංශයේ ප්‍රකාශකවරයෙකු පැවසීය.
ශ්‍රී ලාංකික සිනමා අධ්‍යක්ෂවරයකු වන චන්ද්‍රන් රත්නම් විසින් නිර්මාණය කෙරෙන කේජ් බර්ඩ් චිත්‍රපටයෙහි රඟපෑම සඳහා ජෙරමි අයන්ස් පැමිණ තිබේ. මෙවැනි ජාත්‍යන්තර වශයෙන් සුප්‍රකට සම්මානලාභී නළුවන් යොදා, නිෂ්පාදනය කෙරෙන සිනමාපට නිසා, මෙවැනි නළුවන්ගේ සිනමා ලෝලීන්, ශ්‍රී ලංකාව, සිනමා සංචාරක ගමනාන්තයක් ලෙස තෝරාගැනීම ප්‍රවර්ධනය කිරීම, මෙම සිනමා නිර්මාණවල ප්‍රධානතම අරමුණක් වේ. ජෙරමි අයන්ස් ඉන්දියාවේ මුම්බායි සිට ශ්‍රී ලන්කන් ගුවන් යානයකින් පැමිණ තිබුණි.
ඔහු පිළිගැනීම සඳහා ශ්‍රී ලංකා සංචාරක ප්‍රවර්ධන කාර්යාංශයේ නියෝජ්‍ය අධ්‍යක්ෂ හරේන්ද්‍රා විජේවර්ධන සහ ජාත්‍යන්තර සිනමාකරණ සහ ප්‍රවර්ධන අංශයේ සහකාර අධ්‍යක්ෂ චමින්ද මුණසිංහ යන නිලධාරීන් ගුවන් තොටුපොළ වෙත පැමිණ සිටියහ.
කටුනායක – ටී.කේ.ජී.කපිල
