විපක්ෂ නායක පොසොන් පණිවුඩය
බුදුදහමේ මඟ අනුව යමින් නැවතත් ස්වයංපෝෂිත රටක් කරා පියනඟමු යැයි විපක්ෂ නායක සජිත් ප්‍රේමදාස මහතා සිය පොසොන් පණ්වුඩයෙන් කියා සිටී.
බුදුරජාණන් වහන්සේ විසින් වදාළ අතිඋතුම් සද්ධර්මය රැගෙන මෙරටට වැඩම කළ මිහිඳු මහරහතන් වහන්සේගේ ලංකාගමනය සිහිපත් කරමින් වසර දහස් ගණනක සිට අප රටේ ජනතාව ඉමහත් ශ්‍රද්ධාවෙන් භක්තියෙන් පොසොන් උත්සවය සමරති.
මිහිඳු මහරහතන් වහන්සේගේ ලංකාගමනයත් සමග අප රටට බුදුදහම පමණක් නොව තවත් කලා ශිල්ප, සංස්කෘතීන් නියෝජනය කරමින් 18 කුලයක ප්‍රවීණයන්ගේ ආභාසය ද ලැබුණු බව ඓතිහාසික මූලාශ්‍ර සාක්ෂි දරයි. එම කලා ශිල්ප අප රටේ සංස්කෘතියට සිදු කළ බලපෑම අතිමහත් ය.
එතෙක් ගස් ගල්වලට වන්දනාමාන කරමින් සිටින ජනතාවගේ ජීවිතයට අර්ථයත් නිවැරදි ධර්මයත් ලැබුණි. එකී ධර්මයත් කලා ශිල්පත් නිසා වසර දහස් ගණනක සිට අප රටේ දියුණුව සෑදුණි. ජන ජීවිතයේ සෑම අංගයක්ම බුදු දහම හා බැඳුණු අතර එය වඩාත් යහපත් රාජ්‍ය පාලනයක් සහ ජන ජීවිතයක් ඇති කරලීමෙහි ලා හේතු විය. ඒ නිසාම අප රට ලෝකය පුරා ප්‍රසිද්ධ වූයේ පෙරදිග ධාන්‍යාගාරය යනුවෙනි.
නමුත් සැබවින්ම අප රට දැන් ඒ තත්ත්වයේ පවතින්නේ ද යන්න ගැටලුවක්ව පවතී. එබැවින් නැවත වරක් අප රටක් ලෙස නැඟීසිටිය යුතුය. රටක් ලෙස සශ්‍රීක වී ස්වයංපෝෂිත විය යුතුය. ඒ සඳහා බුදුදහමින් පෙන්වා දුන් නිවැරදි මඟපෙන්වීම ලබා ගෙන ඉදිරියට යෑමට අප කටයුතු කළ යුතුය. සෙසු ආගම්වලට හිමි නිසි තැන ලබා දෙමින් බුදු දහම ආරක්ෂා කිරීම රාජ්‍යයේ වගකීම විය යුතුය. එකී වගකීම නොපිරිහෙළා ඉටු කිරීමට මේ පොසොන් පොහෝ දිනයේ සිටම සියලු දෙනා අදිටන් කරගත යුතුය.
