‘සිරකරු අයිතිවාසිකම් සුරැකීමේ කමිටුව’
ජනාධිපති සමාව අනීතිකව සහ වංචනිකව භාවිත කරමින් අනුරාධපුර බන්ධනාගාරයෙන් රැඳවියකු නිදහස් කිරීම සම්බන්ධයෙන් පරීක්ෂණයක් ඉල්ලා ‘සිරකරු අයිතිවාසිකම් සුරැකීමේ කමිටුව’ ඊයේ (09දා) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.
බන්ධනාගාර රැඳවියන්ට සමාව දීමට ජනාධිපතිවරයාට ආණ්ඩුක්‍රම ව්‍යවස්ථාවෙන් බලය දී ඇතත්, එය අවශ්‍ය අයට ක්‍රියාත්මක කිරීම සඳහා විනිවිදභාවයක් තිබිය යුතු බව ‘සිරකරු අයිතිවාසිකම් සුරකීමේ කමිටුව’ වෙනුවෙන් නීතිඥ සේනක පෙරේරා මහතා මාධ්‍යයට පැවසීය.
“අනුරාධපුර බන්ධනාගාරයේ සිදුවූ බව කියන අනීතිකව රැඳවියකු නිදහස් කිරීම නිසා සෙසු රැඳවියන් විශාල පිරිසකට අසාධාරණයක් සිදුවෙලා. අපි අනුරාධපුර බන්ධනාගාරයේ පවතින සියලු දූෂිත කටයුතු සම්බන්ධයෙන් බලධාරීන්ට පැමිණිලි කර තිබෙනවා. සමාව දීම සඳහා අදාළ ලේඛනය ජනාධිපතිවරයාට ලබාදෙන්නේ බන්ධනාගාරය හරහා, මෙතැන යම් වංචාවක්, අනියතභාවයක් සිදුව ඇත්නම් ඒ වගකීමෙන් බන්ධනාගාර නිලධාරීන්ට ගැලවෙන්න බැහැ” යැයිද නීතිඥවරයා කියා සිටියේය.
සුජීව තත්සර
