ඉකුත් සෙනසුරාදා ඇමරිකානු හමුදා විසින් ඉරානයේ න්‍යෂ්ටික මධ්‍යස්ථාන වෙත එල්ල කළ ප්‍රහාරයට ප්‍රතිචාර දැක්විය යුත්තේ කෙසේද යන්න පිළිබඳව තීරණය කරනුයේ ඉරාන හමුදාවන් විසින් බව එක්සත් ජාතින්ගේ සංවිධානයේ ඉරාන නියෝජිත අමීර් සයිඩ් ඉරාවනි ප්‍රකාශ කර තිබේ. ඇමරිකානු ප්‍රහාරවලට එරෙහිව එල්ල කරන ප්‍රතිප්‍රහාරයන් එල්ල කරන කාලසීමාව, එම ප්‍රහාරවල ස්වාභාවය හා පරිමාව තීරණය කරනුයේ ඉරාන හමුදාවන් විසින් බව ඔහු සඳහන් කර තිබේ.
මේ අතර ඇමරිකානු ප්‍රහාරවලට එරෙහිව සිදු කරන බවට ඉරානය විසින් පවසා ඇති ප්‍රතිප්‍රහාරයන් කෙබඳු ස්වරූපයක් ගනී දැයි මුළු ලොවම බලාගෙන සිටින මොහොතක ඉරානයේ උත්තරීතර නායක අයතොල්ලා අලී කුමේණි ප්‍රකාශ කර ඇත්තේ සිය සියොන්වාදී සතුරාට දඬුවම් ලබාදෙන බවයි. ඔහුට අමතරව ඉරාන හමුදා නිලධාරීන් හා පාර්ලිමේන්තු මන්ත්‍රීවරුන්ද පවසා ඇත්තේ ඇමරිකාවට ඉරානයේ න්‍යෂ්ටික මධ්‍යස්ථානවලට එල්ල කළ ප්‍රහාරයන් වෙනුවන් වන්දි ගෙවීමට සිදුවනු ඇති බවයි. මේ අතර එක්සත් ජාතීන්ගේ ආරක්ෂක මණ්ඩලය ඉරානයට එල්ල වූ ඇමරිකානු ප්‍රහාර සම්බන්ධයෙන් සාකච්ඡා කිරීම සඳහා පෙරේදා හදිසියේ
රැස්වූ අවස්ථාවේදී ඉරානය විසින් ඇමරිකාව හා ඊශ්‍රායලය හෙළා දැක තිබේ. ඉරානයේ න්‍යෂ්ටික මධ්‍යස්ථාන ඉලක්ක කරගනිමින් ඇමරිකානු හමුදාවන් විසින් එල්ල කරන ලද ප්‍රහාරයන් හෙළා දකිමින් ප්‍රංශය ,පකිස්තානය, ග්‍රීසිය හා පිලිපීනයේ ඊයේ දිනයේ විරෝධතා පැවති අතර එහිදී විරෝධතාකරුවෝ ඇමරිකානු ප්‍රහාර තරයේ හෙළා දැක තිබේ.
