මුදල් භාරකරු සහ සගයෝ අත්අඩංගුවට
ව්‍යාපාරික ආයතනවල දෛනිකව එකතු වන මුදල් ගෙන ගොස් කොළඹ මූල්‍ය ආයතනවලට භාරදීමේ රාජකාරියේ නිරත වී සිටි මුදල් භාරකරුවකු සිය සගයින් දෙදෙනකු සමග එක්ව පැහැර ගත් රුපියල් හාරකෝටි හැටනව ලක්ෂ නවසිය හතළිහක මුදලක් පැය 24 ක් ගත වීමට මත්තෙන් පෙරේදා (05 දා) කටාන පොලිසියේ නිලධාරීන් පිරිසක් විසින් සොයාගෙන සැකකරුවන් අත්අඩංගුවට ගෙන තිබේ.
මෙම මුදල් භාරකරු සිය රියැදුරු සමග මෝටර් රථයකින් කිඹුලාපිටිය ප්‍රදේශයේ මෝටර් රථ අලෙවි කරන ආයතනයක මුදල් භාර ගැනීම සඳහා 03 වැනිදා රාත්‍රී 06.30 ට පැමිණ තිබේ. එහිදී කටියල පලතුරු කම්හලට හැරෙන හංදියේ දී යතුරුපැදියකින් පැමිණි දෙදෙනකු තම මුදල් රැගත් මෝටර් රථය හරස් කර මුදල් රැගෙන පලා ගිය බව මුදල් භාරකරු පොලිසියට පැමිණිලි කර තිබේ.
සිද්ධිය සම්බන්ධයෙන් වහා ක්‍රියාත්මක වූ පොලිසිය මුදල් භාරකරු පැමිණෙන අතරතුර අතරමගදී තවත් මෝටර් රථයක රියැදුරකු සමග කිසියම් කතාබහක නිරත වන ආකාරය ප්‍රදේශයේ ආරක්ෂක කැමරා පද්ධති නිරීක්ෂණය කිරීමෙන් අනාවරණය කර ගෙන තිබේ.
ඒ අනුව ඉදිරි විමර්ශන කටයුතු මෙහෙයවූ කටාන පොලිසිය මුදල් භාරකරු අතරමගදී කතා කළ මෝටර් රථයේ සිට ඇත්තේ මුදල් භාරකරු ගමන් ගත් මෝටර් රථයේ රියැදුරුගේ ඥාතී සොහොයුරකු බවත් ඔවුන් දෙදෙනාම කඩවත ප්‍රදේශයේ පදිංචිකරුවන් බවත් අනාවරණය කර ගෙන තිබේ.
ඉකුත් 05 වැනිදා දහවල් වනවිට මුදල් භාරකරු, ඔහුගේ රියැදුරු ඥාතී සොහොයුරා වන රියැදුරු ද පොලිසිය විසින් අත්අඩංගුවට ගෙන විමර්ශන ආරම්භ කර තිබිණි. කඩවත ප්‍රදේශයේ පිහිටි ඥාතී සොහොයුරාගේ නිවසේ පැහැර ගත් බවට සඳහන් කළ මුදල සඟවා තිබියදී පොලිසිය විසින් අත්අඩංගුවට ගෙන තිබේ.
සිද්ධිය පිළිබඳ වැඩිදුර විමර්ශන කටයුතු මීගමුව කොට්ඨාසය භාර ජ්‍යෙෂ්ඨ පොලිස් අධිකාරි අශෝක ධර්මසේන මහතාගේ උපදෙස් මත සහකාර පොලිස් අධිකාරි ලාල් චන්ද්‍රසිරි මහතාගේ අධීක්ෂණයෙන් කටාන පොලිසියේ ස්ථානාධිපති ප්‍රධාන පොලිස් පරීක්ෂක සුදසිංහ, අපරාධ විමර්ශන අංශයේ ස්ථානාධිපති උප පොලිස් පරීක්ෂක අයේෂ් පෙරේරා, උප පොලිස් පරීක්ෂකවරුන් වන සේනාරත්න, ඩයස්, පොලිස් සැරයන් (38852) දුලිප්, පොලිස් කොස්තාපල්වරුන් වන (82758) කුලතුංග, (97902) ධනංජය සහ (102353) අකලංක යන නිලධාරීහු සිදු කරති.
කටුනායක – ටී. කේ. ජී. කපිල
