යුද හමුදාව හා ප්‍රදේශවාසීන් සමග ගොඩගන්න පශු වෛද්‍යවරු ලොකු සටනක
වෙඩි වැදීමෙන් තුවාල ලබා පොල්පිතිගම ප්‍රදේශයේ වතුර වළකට වැටී ජීවිතයත්, මරණයත් අතර වේදනාබර සටනක යෙදී සිටින භාතිය නම් දළ ඇතාගේ ජීවිතය බේරා ගැනීම සඳහා පේරාදෙණිය විශ්වවිද්‍යාලයේ පශු වෛද්‍ය පීඨයේ මහාචාර්ය අශෝක දංගොල්ල මහතා ඇතුළු පශු වෛද්‍යවරු විශාල පරිශ්‍රමයක නිරතව සිටිති. යුද හමුදා නිලධාරීන්ගේ ද සහායෙන් වතුර වළේ ජලය ඉවත් කරමින් ඇතාට ප්‍රතිකාර කිරීම ඊයේ (06දා) වනවිට කඩිනම් කරමින් තිබුණි.
මහාචාර්ය දංගොල්ල මහතා ඇතා පරීක්‍ෂා කර වළේ ජලය අඩුකර ප්‍රතිකාර (සේලයින්) ලබාදීම ආරම්භ කර තිබිණි. ඇතාගේ මාංසපේශි දුර්වල මට්ටමක පැවැතීම නිසා ඇතා කෙළින් නොකර වළේ කොනකට ගෙන ප්‍රතිකාර කළ යුතු බවත් වතුර වළේ රැඳීසිටීම නිසා ඇතාගේ ජීවිතය මේ වනතෙක් රැඳී ඇති බවත් දංගොල්ල මහතා පවසයි.
රුධිර සාම්පල් පරීක්‍ෂාවෙන් ඇතාගේ පෝෂණ මට්ටම පහත යමින් පවතින බව නිරීක්‍ෂණය වී තිබේ. එම තත්ත්වයෙන් මුදා ගැනීම සඳහා පෝෂණ මට්ටම ඉහළ නැංවීමට අවශ්‍ය දෑ සිදුකරමින් සිටින බවත් ඒ මහතා කීය.
දැනට සිදුකරන ප්‍රතිකාර කඩිනමින් කිරීමට ඇතාට අවශ්‍ය අනෙකුත් පහසුකම් සලසා දෙන ලෙසට පසුගිය සිකුරාදා (04දා) ඇතාට ප්‍රතිකාර කරන ස්ථානයට පැමිණි පරිසර ඇමැති වෛද්‍ය ධම්මික පටබැඳි මහතා නිලධාරීන්ට උපදෙස් ලබාදුන්නේය.
මහාචාර්ය දංගොල්ල මහතා සමග පේරාදෙණිය විශ්වවිද්‍යාලයේ පශු වෛද්‍ය කණ්ඩායම්, වනජීවී සංරක්‍ෂණ දෙපාර්තමේන්තුවේ ප්‍රධාන පශු වෛද්‍ය අධ්‍යක්‍ෂ තාරක ප්‍රසාද්, වනජීවී සංරක්‍ෂණ දෙපාර්තමේන්තුවේ නිලධාරීන්, මහව පොලිස් නිලධාරීන්, යුද හමුදා නිලධාරීන් එක්ව ඇතාගේ ජීවිතය බේරා ගැනීම සඳහා දැඩි වෙහෙසක් ගනිමින් සිටින අතර ප්‍රදේශවාසීන් ඇතාට අවශ්‍ය ආහාර රැගෙනවිත් දීම ද ආරම්භ කර තිබුණි.
යුද හමුදාව විසින් ඇතා අව් රශ්මියෙන් ආරක්‍ෂා කර ගැනීම සඳහා අව් ආවරණයක් ඉදිකිරීමටත් වැලි කොට්ට යොදා ඇතාගේ හිස ජලයට වැටීම වළක්වා ගැනීමටත් කටයුතු කර තිබුණි.
ජගත් කනහැර, චමින්ද සිල්වා
