වහලය මත සවි කරන සූර්ය පැනල මගින් නිපදවන විදුලිය සඳහා ලබා දෙනු ලබන ගෙවීම් අඩු කිරීම පිටුපස පුනර්ජනනීය බලශක්තිය ප්‍රවර්ධන වැඩසටහන කඩාකප්පල් කිරීමේ කුමන්ත්‍රණයක් තිබෙන බව එම ක්ෂේත්‍රයේ ආරංචි මාර්ග සඳහන් කරයි.
එකී කුමන්ත්‍රණය පිටුපස අමාත්‍යාංශයේ ඉහළම නිලධාරියකු සහ ලංකා විදුලිබල මණ්ඩලයේ ඉහළම නිලධාරීන් කීපදෙනකු සිටින බව සඳහන්ය.
විෂය භාර ඇමැතිවරයා ද නොමඟ යවමින් තාප බලාගාර ප්‍රවර්ධනය කිරීමේ අරමුණින් එකී පිරිස මෙම කටයුතු සිදුකරන බව පැවසෙයි.
පසුගිය වසර පහ තුළ තාප බලාගාර ක්‍රියාත්මක කිරීම සඳහා ඉන්ධන මිලට ගැනීම වෙනුවෙන් රුපියල් බිලියන 744 තරම් වූ දැවැන්ත වියදමක් සිදුකර ඇති අතර එහිදී විදුලි ඒකකයක් නිපදවීම සඳහා රුපියල් 60.61 තරම් අධික පිරිවැයක් දරා තිබේ.
සූර්ය පැනල සඳහා මීට පෙර ගෙවනු ලැබූ රුපියල් 27.00 ගෙවීම් පසුගියදා 16 වැනිදා රැස්වූ කැබිනට් මණ්ඩල රැස්වීමේදී රුපියල් 20.90 සිට රුපියල් 14.46 දක්වා වූ පරාසය තුළ අඩුකිරීමට පියවර ගෙන ඇත.
මේ අතර, බැටරියක් සහිතව වහලය මත සවි කරන සූර්ය පැනල පද්ධති මගින් නිපදවන විදුලි ඒකකයක් සඳහා කරන ගෙවීම් ඉහළ දැමීමට (රු. 45.80) ලංවිම ක්‍රියාකර ඇති අතර එය මුළුමනින්ම ජනතාව මුළා කිරීමක් බව පුනර්ජනනීය බලශක්ති සංවර්ධකයන්ගේ සංගමය සඳහන් කරයි.
බැටරියක් සඳහා සිදු කළ යුතු වියදම ඉතා අධික එකක් බැවින් එකී ගෙවීම් ඉතා අඩු එකක් බව ඔවුහු කියති.
තාප බලාගාර මගින් නිෂ්පාදනය කෙරෙන විදුලි ඒකකයක් වෙනුවෙන් සාමාන්‍යයක් ලෙස රුපියල් 60.61 වැය වීමේ පසුබිම තුළ පුනර්ජනනීය බලශක්තිය ප්‍රවර්ධනය නොකිරීම විමතියට කාරණයක් බවත් ඔවුහු වැඩිදුරටත් සඳහන් කරති.
බලධාරීන්ගේ මෙම තීරණ බලශක්ති ක්ෂේත්‍රය අස්ථාවර කිරීමටත්, ආයෝජකයන්ගේ විශ්වාසය බිඳ දැමීමටත් හේතුවක් මෙන්ම ඉදිරි බලශක්ති ඉලක්ක අනතුරේ හෙළීමක් බවත් එම සංගමය වැඩිදුරටත් සඳහන් කරයි.
සිරිමන්ත රත්නසේකර
