ජාතික ජන බලවේගයේ පාර්ලිමේන්තු මන්ත්‍රී ආචාර්ය හර්ෂණ සූරියප්පෙරුම මහතාගේ ඉවත්වීමෙන් පුරප්පාඩු වූ මන්ත්‍රී ධුරය සඳහා ජාතික ලැයිස්තුවේ අපේක්ෂකයකු පමණක් වන අයකු නම් කිරීමට එම බලවේගය තීරණය කර ඇත.
ඒ අනුව එකී අවස්ථාව දැනට ජාතික ලැයිස්තුවේ ඉතිරිව සිටින අපේක්ෂකයන් දොළොස් දෙනකුගෙන් එක් අයකුට හිමිවීමට නියමිතය.
එකී අපේක්ෂකයන් වනුයේ මහාචාර්ය වසන්තා සුබසිංහ, කීර්ති වැලිසරගේ, චමිලා කුමුදු පිරිස්, අබ්දුල් ෆාතා මොහොමඩ් ඉක්රාම්, මොහොමදු නසීර් ඉම්රාම්, මාටින් නෙල්සන්, රොමේෂ් මොහාන් ද මැල්, බෙනීටා ප්‍රිෂාන්ති හෙට්ටිතන්ත්‍රී, පුබුදු නුවන් සමරවීර, සරත් ලාල් පෙරේරා, අනුර හෙට්ටිගොඩ ගමගේ, හේමතිලක ගමගේ යන අයයි.
ජාතික ලැයිස්තුවේ අපේක්ෂකයින් ගණන 29කි. මැතිවරණයේදී ජාතික ජන බලවේගයට ජාතික ලැයිස්තු මන්ත්‍රී ධුර 18ක් හිමිවිණි. එහිදී ජාතික ලැස්තුවෙන් 16 දෙනකු සහ මැතිවරණයට තරග කර පරාජය වූ දෙදෙනකු ජාතික ලැයිස්තුවෙන් පත් කෙරිණි.
ජාතික ලැයිස්තු අපේක්ෂකයකු වන රංජන් ජයලාල් මහතා කඩුවෙල නගරාධිපති වශයෙන් පත්ව ඇති බැවින් ඔහුට පාර්ලිමේන්තු මන්ත්‍රීවරයකු වශයෙන් දිවුරුම් දීමේ අවස්ථාවක් නොලැබෙනු ඇති බව සඳහන් වේ.
පුරප්පාඩු වූ මන්ත්‍රී ධුරය සඳහා ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා නම් කෙරෙනු ඇති බවට යම් යම් වාර්තා පළව ඇති නමුත් එය කිසිලෙසකවත් සිදු නොවන කටයුත්තක් බව ‘ දිවයින ඉරිදා සංග්‍රහය’ කළ විමසීමකදී හෙතෙම තහවුරු කර කියා සිටියේය.
සිරිමන්ත රත්නසේකර
