ළමා යාචකයින් සම්බන්ධයෙන් 2024 වසරේදී පැමිණිලි 229 ක් ලැබී තිබෙන බව ජාතික ළමා රක්ෂක අධිකාරිය සඳහන් කරයි.
මේ අතර මේ වසරේ ගත වූ මාස 05 තුළ එනම් 2025 ජනවාරි මාසයේ සිට මැයි මාසය දක්වා පැමිණිලි 77 ක් ලැබී තිබෙන බව ද ඔවුහු කියති.
මේ සම්බන්ධයෙන් 2025 ජනවාරි, පෙබරවාරි සහ අප්‍රේල් මාසවලදී පැමිණිලි 16 බැගින් ද මාර්තු මාසයේ පැමිණිලි 17 ක් ද මැයි මාසයේදී පැමිණිලි 12 ක් ද ලැබී ඇති බව ජාතික ළමා රක්ෂක අධිකාරිය සඳහන් කරයි.
ශ්‍රී ලංකා පුවත්පත් ආයතනයේ ’ෆැක්ට් සීකර්’ කළ දත්ත පරීක්ෂාවකදී මේ තොරතුරු අනාවරණය විය.
මීට අමතරව 2024 වසර වන විට මෙරට ජනගහනය දෙකෝටි දාහත් ලක්ෂ හැටතුන් දහස් එකසිය හැත්තෑවක් වන බව ජනගහන හා සංඛ්‍යාලේඛන දෙපාර්තමේන්තුව කළ සමීක්ෂණයකින් පසු නිකුත් කළ වාර්තාවකින් අනාවරණය කරයි.
ඒ අතරින් හිසට වහලක් නැති පුද්ගලයින් 2281 ක සිටින බව සඳහන් වෙයි.
1971 වසරේ මෙරට ජනගහනය එක්කෝටි විසි හය ලක්ෂ අසූ නව දහස් අටසිය අනූ හතක් ලෙස පැවැති අතර එය 2012 වසරේදී දෙකෝටි තිස්පන් ලක්ෂ නව දහස් හාරසිය තිස්නවයක් දක්වා වැඩි වී ඇත.
මෙරට ජනගහනයෙන් සියයට 30 ක් ළමයින් වන අතර වයස අවුරුදු 18 ට අඩු දරුවන් සිඟමනේ යෙදවීම, වෙළඳාම් කටයුතුවල වයස අවුරුදු 16 – 18 අතර ළමයින් ගෘහස්ථ සේවයේ යෙදවීම සහ අනතුරුදායක රැකියාවල යෙදවීම ජූලි මස 01 දා සිට තහනම් කිරීමට කැබිනට් මණ්ඩලය තීරණය කර ඇත.
ඒ සඳහා දැනට පවතින විධිවිධාන දැඩිව බලාත්මක කිරීමට ද කැබිනට් මණ්ඩලය තීරණය කර ඇත.
රනිල් ධර්මසේන
