යුද හමුදාව සමාජ මාධ්‍යවලින් ඉල්ලයි
රටේ යහපත උදෙසා ගුණාත්මක හමුදාවක් පවත්වාගෙන යෑමට රජය ගන්නා තීරණ ඇතැම් සමාජ මාධ්‍ය වැරදි ලෙස සමාජගත කිරීම නිසා එය රටට අහිතකර ලෙස බලපාන බව ශ්‍රී ලංකා යුද හමුදාව නිවේදනයක් නිකුත් කරමින් කියා සිටී.
ශ්‍රී ලංකා යුද හමුදාව සිවිල් සමාජය තුළ අපකීර්තියට පත් කිරීමේ අරමුණෙන් ඇතැම් සමාජ මාධ්‍ය ජාලා සමාජගත කර ඇති කරුණු කිහිපයක් සාවද්‍ය තොරතුරු බවට සනාථ කිරීමේ අරමුණෙන් එම නිවේදනය නිකුත් කර තිබේ.
යුද හමුදාව මගින් කූට ලේඛන සාදා ජනාධිපතිවරයාගේ අනුමැතියෙන් තොරව නිලධාරීන් කිහිපදෙනකු වංචනිකව හමුදාවෙන් ඉවත් කර ඇති බවත් තවත් නිලධාරීන් පිරිසක් පෞද්ගලික කෝන්තර මත යුද හමුදාවෙන් ඉවත් කිරීමට කටයුතු කරමින් සිටින බවත් ඇතැම් සමාජ මාධ්‍ය මගින් ප්‍රකාශ කර ඇත.
විවිධ පාර්ශ්ව සිය පටු අරමුණු ඉෂ්ට කර ගැනීම සඳහා වගකීම් විරහිතව තොරතුරු සමාජගත කරමින් සිටින බවත් ආරක්‍ෂක හේතු මත යුද හමුදාවේ සිදුවන සෑම කටයුත්තක්ම සමාජයට අනාවරණය කළ නොහැකි බවත් යුද හමුදාව පෙන්වා දෙයි.
යුද හමුදාව පෞද්ගලික න්‍යාය පත්‍රයක් හා පළිගැනීම් මත ක්‍රියාකරන ආයතනයක් බවට සමාජය තුළ වැරදි ආකල්පයක් ඇති කිරීමට ඇතැම් සමාජ මාධ්‍ය ගත් උත්සාහයක් බවට සමාජය දැනුවත් කිරීමේ අරමුණින් එම නිවේදනය නිකුත් කර තිබේ.
යුද හමුදාවේ නිලධාරි සංයුතියට අනුව එය පහළ සිට ඉහළට පිරිමීඩාකාරව හැඩගැන්වී ඇති ආයතනයකි. පහළ ස්තරවල නිලධාරීන් විශාල සංඛ්‍යාවක් සිටින නමුත් ඉහළට යෑමේදී එය ක්‍රමානුකූලව කුඩා වේ. එම පිරමීඩාකාර ක්‍රමවේදය නිසි පරිදි පවත්වාගෙන යෑමට යුද හමුදාව විවිධ පරිපාලන නිර්ණායකක් ක්‍රියාත්මක කරයි.
එම නිර්ණායක සපුරාලිය නොහැකි වන නිලධාරීන්ට සේවයෙන් ඉවත් වීමට සිදුවේ. හමුදා නිලධාරීන් විශ්‍රාම ගැනීම් හා ඉවත්වීම් පිළිබඳ නිලධාරි රෙගුලාසි මාලාව තුළ පැහැදිලිව දක්වා ඇති අතර ලොව බොහෝ රටවල හමුදාවන් කරන පිළිවෙත් ක්‍රමවේදයට අනුව නිලධාරීන්ගේ ඉවත්වීම හා විශ්‍රාම යෑම සිදුවේ.
යම් නිලධාරියකුට අසාධාරණයක් සිදුවී ඇති බවට හැඟෙන්නේ නම් ඒ පිළිබඳව උපදේශන මණ්ඩලය ඉදිරියේ කරුණු දැක්වීමට අවස්ථාව ද හිමිවේ.
යුද හමුදාව යනු ජාතික ආරක්‍ෂාව සැබැඳිව කටයුතු කරන ත්‍රිවිධ හමුදාවේ ප්‍රධානතම කොටස්කරුවකු බවත් එවැනි ආයතනයක රැඳීසිටිය යුතු වන්නේ විනයගරුක හා කාර්යක්ෂම අයවලුන් පමණක් බවත් එසේ නොමැති වුවහොත් යුද හමුදාවේ ගුණාත්මක බව අඩුවීමත් එය ජාතික ආරක්‍ෂාව කෙරෙහි බලපාන බවත් ගුණාත්මක යුද හමුදාවක් පවත්වාගෙන යෑම සඳහා ගනු ලබන තීරණ වැරදි ලෙස සමාජගත නොකරන ලෙස යුද හමුදාව සමාජ මාධ්‍ය ජාලාවලින් ඉල්ලා සිටී.
ධම්මික සල්වතුර
