තායිලන්ත විවෘත මලල ක්‍රීඩා ශූරතා තරගාවලියේ සමාප්තිය අද
බැංකොක් අගනුවර දී දැන් ක්‍රියාත්මක තායිලන්ත විවෘත මලල ක්‍රීඩා ශූරතා තරගාවලියේ සමාප්තිය අද (24දා) සිදු කෙරේ.
රටවල් 10 ක පමණ ක්‍රීඩක ක්‍රීඩිකාවන්ගේ සහභාගිත්වය ඇතිව පැවැත්වෙන මෙවර තරගාවලියේදී කැපී පෙනෙන දක්ෂතා ප්‍රදර්ශනය කරමින් රන් පදක්කම් දිනා ගැනීමට ශ්‍රී ලංකාවේ රුසිරු චතුරංග සහ නෙත්මිකා මදුශානි හේරත් සමත් වූහ. මීට අමතරව වී. වොක්ෂන්, වත්සලා හපුආරච්චි සහ ඩබ්ලිව්. කේ. එල්. ඒ නිමාලී රිදී පදක්කම් දිනා ගනිමින් මව්බිමට අභිමානය එක් කළහ.
පිරිමි මීටර් 1500 ඉසව්වේ තරග නිමි කාලය ලෙස මිනිත්තු 03. 53. 30 ක දක්ෂතාවයක් ප්‍රදර්ශනය කරමින් රන් පදක්කම දිනා ගැනීමට රුසිරු චතුරංග සමත් වූයේය. එකී ඉසව්වේ රිදී පදක්කම ශ්‍රී ලංකාව වෙනුවෙන් වී. වොක්ෂන් දිනා ගත්තේ මිනිත්තු 03. 54. 72 ක තරග නිමි කාලයක් සටහන් කරමිනි. එහි ලෝකඩ පදක්කම මැලේසියාව සතු විය.
මේ අතර වාරයේ දී පිටිය ඉසව්වක් ආශ්‍රිතව පළමු රන් පදක්කම දිනා ගැනීමට නෙත්මිකා මධුෂානී හේරත් සමත් වූයේ කාන්තා දුර පැනීම ඉසව්වේදී ප්‍රදර්ශනය කළ මීටර් 06.37 දක්ෂතාවය සමගිනි. එම දක්ෂතාව ඇයගේ අවසන් උත්සාහයේ දී සටහන් වීම ඉහළ අගයක් ගත්තේය.
මේ අතර වාරයේ දී කාන්තා මීටර් 1500 ඉසව්වේ රිදී පදක්කම තහවුරු කර ගැනීමට ඩබ්ලිව්. කේ. එල්. ඒ. නිමාලී සමත් වූයේ මිනිත්තු 04.32.39 ක දක්ෂතාවයක් සටහන් කර ගනිමිනි. එකී ඉසව්වේ රන් පදක්කම වියට්නාමයට හිමි වූ අතර ලෝකඩ පදක්කම මැලේසියාව සතු විය. කාන්තා මීටර් 100 කඩුලු මතින් දිවීමේ රිදී පදක්කම වත්සලා හපුආරච්චීචි සතු විය.
ක්‍රීඩක ක්‍රීඩිකාවන් 08 දෙනකුගෙන් සැදුම්ලත් ශ්‍රී ලංකා කණ්ඩායමේ පුහුණුකරු ලෙස අනුර බණ්ඩාර මහතා කටයුතු කළේය.
අනුරුද්ධ හේරත් බණ්ඩාර
