සරසවි විශ්ව ගම්මානය පසුගියදා හෝමාගම දාම්පේ වෙරළුගොඩ අක්කර එකහමාරක භූමියක ස්ථාපිත කරන ලදී. අනුරාධපුර මරදන්කඩවල දම්පැලැස්ස ගම් පියසෙන් ඉපිද කොළඹ විශ්වවිද්‍යාලයෙන් උපාධිය හදාරා අනතුරුව පාර්ලිමේන්තු ආංශික අධීක්‍ෂණ කාරක සභා තරුණ නියෝජිතවරයකු ලෙස කටයුතු කළ ටී. තුෂිත කුමාර මහතාගේ සංකල්පයක් මත මෙම සරසවි විශ්ව ගම්මානය සාහිත්‍ය සූරී මහාචාර්ය ප්‍රීති කුලතුංග මහතා විසින් පරිත්‍යාග කරන ලද ඉඩමෙහි ස්ථාපිත කරන ලදී.
මීට වසර පහකට පමණ ඉහතදී මල්වතු පාර්ශ්වයේ ගාලු කඩවත් සතර හා බෙන්තර වලල්ලාවිට කෝරළයේ උප ප්‍රධාන සංඝනායක ඇල්ලේ ඤාණසිරි හිමියන් ඇතුළු උගත් වියත් මහ සඟරුවනගේ දායකත්වය මත බෞද්ධ දර්ශනයේ පුනර්ජීවනය උදෙසා විවිධ දේශනා පවත්වමින් භික්‍ෂුන් වහන්සේලා තුෂිත කුමාර මහතාගේ සංකල්පය මත ශ්‍රී ශාක්‍යසිංහ පදනම නිර්මාණය වී ඇත. තුෂිත මහතා විසින් අන්තර්ජාලය ඔස්සේ බෞද්ධ වැඩසටහන් විශ්වවිද්‍යාල ආචාර්ය හා මහාචාර්යවරුන් සම්බන්ධ කර ගනිමින් ජනතාවට දැනුම ලබාදෙන ලදී. ඒ හරහා ශ්‍රී ශාක්‍යසිංහ සරසවිය හා රෝයල් හයි කැම්පස් යන ආයතන දෙස් විදෙස් දූ දරුවන්ට පමණක් නොව භික්‍ෂුන් වහන්සේලාට අවශ්‍ය දැනුම ලබාදීමටද ඉඩකඩ වෙන්වුණි. ඊට අමතරව සිල් මෑණිවරුන්ට, රාජ්‍ය සේවකයන්ට විවිධ වෘත්තීන් හි නියැළෙන්නන්ට දැනුම ලබාදීමද එම පදනම විසින් සිදු කරනු ලබන අතර ශ්‍රී ශාඛ්‍ය සිංහ සරසවිය හරහා බෞද්ධ වැඩසටහන් ද ශ්‍රී දළදා මාලිගයට අනුබද්ධ ජාත්‍යන්තර බෞද්ධ විශ්වවිද්‍යාල හරහා උපාධි, පශ්චාත් උපාධි හැදෑරීමට අවස්ථාව ලබාදීමට හැකිවීම ජයග්‍රහණයක් බව සරසවි ගම්මාන විවෘත කිරීමේදී පැවැති උත්සවයේදී එහි අධ්‍යක්‍ෂ තුෂිත කුමාර මහතා සඳහන් කළේය.
මෙම අවස්ථාව ආරාධිත අමුත්තන් ලෙස පැමිණි ශ්‍රී ශාඛ්‍යසිංහ පදනමේ සභාපති උතුරු මැද පළාත් අධිකරණ සංඝනායක අඹගස්වැවේ මුනින්දාලංකාර හිමියන් සහ හිටපු ජනාධිපති මෛත්‍රිපාල සිරිසේන මහතා විසින් මෙම සරසවි ගම්මානය හරහා තරුණ පරපුරට ලබාගත හැකි දැනුම මෙන්ම තාක්‍ෂණය පිළිබඳව විශේෂ දේශනයක් කළ අතර එම අවස්ථාවට පැමිණී හිටපු පාර්ලිමේන්තු මන්ත්‍රී තිලංග සුමතිපාල මහතා විසින් ද තාක්‍ෂණය වත්මන් පරපුරට ලබාගැනීම හා ඒ තුළින් ලෝකය ජය ගන්නේ කෙසේද යන්න පිළිබඳවත් පැහැදිලි කරන ලදී.
ශ්‍රී ලංකා නිදහස් පක්‍ෂයේ මධ්‍යම කාරක සභික හා මහරගම හිටපු නාගරික මන්ත්‍රිනී හා සරසවි විශ්ව ගම්මානයේ ජ්‍යෙෂ්ඨ උපදේශක චන්ද්‍රිකා ද සොයිසා මහත්මිය, සෙනෙවිරත්න කීරවැල්ල මහතා ඇතුළු විද්වතුන් හා ගම්වාසීන් විශාල පිරිසක් සහභාගි වූහ.
අරුණ බෝගහවත්ත
