සජබ ජාතික සංවිධායක තිස්ස අත්තනායක
ඉන්දියාව කලම්බු ඩොක් යාඩ් ආයතනයේ කොටස් වලින් සියයට 51 ක් ලබාගෙන යුද උපකරණ නිෂ්පාදනය කිරීමට භාවිතා කළොත් ලංකාවේ විදේශ ප්‍රතිපත්තියට එල්ල වන බලපෑම ගැන ආණ්ඩුව තක්සේරු කර තිබෙනවාද කියලා ආණ්ඩුවෙන් අහන්න කැමැති යැයි සමගි ජනබලවේගයේ ජාතික සංවිධායක තිස්ස අත්තනායක මහතා පැවසීය. එම පක්ෂයේ ප්‍රධාන කාර්යාලයේ ඊයේ (02දා) පැවැති මාධ්‍ය හමුවට සහභාගි වෙමමින් වැඩිදුරටත් මෙසේද කියා සිටියේය,
ලෝක වෙළඳපොලේ තෙල් මිල තීරණය කරලා වාසි සහගත අවස්ථාවල ඉන්ධන මිල අඩු කිරීමටත් අවාසි සහගත අවස්ථාවල තෙල් මිල වැඩිකිරීම සඳහාත් තමයි ඉන්ධන මිල සූත්‍රයක් හඳුන්වා දෙනු ලැබුවේ. ඒ අනුව හිටපු ඇමැති කංචන විජේසේකර මහතා ඉන්ධන මිල සුත්‍රයක් හඳුන්වා දෙන විට එවැනි දෙයක් රටට අවශ්‍ය නැති බව ජාතික ජන බලවේගය විපක්ෂයේ සිටින කාලයේ ප්‍රකාශ කළා. ඒ වගේම තෙල් මිල පාලනය කිරීමට ආණ්ඩුව නොහැකි නම් ආණ්ඩු ඉල්ලා අස්විය යුතු බව ජාතික ජන බලවේගය විපක්ෂයේ සිටින කාලයේ ප්‍රකාශ කළා. ඒ වගේම වරායට ගොඩබාන ඉන්ධන සහ මහජනතාවට බෙදා හරින ඉන්ධන මිල අතර විශාල වෙනසක් තිබෙන බවත් එයින් විශාල කොමිස් මුදලක් හිටපු ඇමැති කංචන විජේසේකර මහතාගේ සාක්කුවට යන බව ජාතික ජන බලවේගය විපක්ෂයේ සිටින කාලයේ ප්‍රකාශ කළා. කෙසේ නමුත් ජාතික ජනබලවේග ආණ්ඩුවට ඉන්ධින මිල වැඩි කරන්න කිසිදු සාධාරණ හේතුවක් නෑ. ලෝක වෙළඳ පොලේ තෙල් මිල වැඩි වී නෑ.
ඒ වගේම කලම්බු ඩොක් යාඩ් ආයතනය ඉන්දියානු රාජ්‍ය සමාගමකට විකුණා දමන්න තීරණය කරලා තිබෙනවා. කොලම්බු ඩොක් යාඩ් ආයතනයේ සියයට 51 ක කොටස් තමයි මේ ආකාරයට විකුණා දමන්න සූදානම් වන බව වාර්තා වෙනවා. ඒ වගේම සියයට 51 ක කොටස් වල වටිනාකම ඩොලර් මිලියන 150 ක් ව තිබියදී ඉන්දියානු සමාගමට විකුණන්නේ ඩොලර් මිලියන 50 කට. ඒ වගේම කලම්බු ඩොක් යාඩ් ආයතනය තිබෙන අක්කර 25 ක භුමි ප්‍රමාණය මෙම මුදලින් බෙදූ විට පර්චස් එකක් රුපියල් 62,500 ක වගේ මුදලකට තමයි කලම්බු ඩොක් යාඩ් ආයතනය සතු අක්කර 25 විකුණන්න ආණ්ඩුව කටයුතු කරන්නේ. ඒ වගේම මෙම ඉන්දියානු සමාගම යුද උපකරණ නිෂ්පාදය කරන ආයතනයක් බව තමයි වාර්තා වෙන්නේ. ඒ වගේම සබ්මැරින් නිෂ්පාදය සහ යුදමය බෝට්ටු නිෂ්පාදය කිරීම තමයි මෙම ආයතනය සිදුකරන්නේ.
අකිත පෙරේරා
