විල්පත්තුව ජාතික වනෝද්‍යානයේ සැරිසැරූ දැවැන්ත කෙනරුන් දෙදනකු එකම දිනයේ ස්ථාන දෙකකදී ජීවිතක්ෂයට පත්ව තිබීයදී හමුවූ බව වනාතවිල්ලුව වනජීවී ඒකකයේ නිලධාරීන් පවසයි. 28 දා සවස් යාමයේ මෙම තොරතුර වාර්තාවූ බවත් මෙම මරණ දෙක වනාතවිල්ලුව ප්‍රාදේශීය ලේකම් කොට්ඨාසයට අයත් එළුවන්කුලම රාල්මඩුව සහ විජයපුර යන ප්‍රදේශයන්හිදී සිදුවී ඇති බව වනජීවී නිලධාරියා සඳහන් කරයි. වයස අවුරුදු 30-35ත් අතර වයස් ඛාණ්ඩවල පසුවූ කෙනරුන් (ගැහැනු සතුන්) බවත්, ඔවුන් අඩි හතත් අටත් පමණ උසකින් සමන්විතව ඇති බවද කියයි.
අදාළ මෘත දේහයන් වෙත පශ්චාත් මරණ පරීක්ෂණ කටයුතු සිදුකරන තුරු ආරක්ෂාව සැපයීමට කටයුතු කර තිබේ. විල්පත්තුව ජාතික වනෝද්‍යානයට මායිම්ව පිහිටා ඇති පරිවාරක වනාන්තර සහ රක්ෂිත තුළ සැරිසරමින් සිටි එසේ මරණයට පත්ව සිටි කෙනරුන් අතරින් එක් කෙනරක් රජය විසින් ස්ථාපිත කර ඇති විදුලි අලි වැටේ ගැටීමෙන් එම ස්ථානයේදීම මරණයට පත්ව සිටි අයුරු පැහැදිලිව දැකගත හැකි විය.
නමුත් වනජීවී නිලධාරීන් පවසන ආකාරයට මෘත දේහයන් සම්බන්ධයෙන් පශ්චාත් මරණ පරීක්ෂණ කටයුතු සිදු කරන තුරු නිශ්චිතව මරණයට හේතුව සඳහන් කිරීමට අපහසු බවත් කඩිනමින් පශ්චාත් මරණ පරීක්ෂණ කටයතු සිදු කරන බවත් වනජීවී නිලධාරීහු සඳහන් කරති.
පුත්තලම – නලින් හෙන්දුරුගොඩ
