කරුණු විමසන්න සී.අයි.ඩී. නිලධාරියා උසාවි කැඳවයි
ප්‍රධාන පෙළේ ව්‍යාපාරිකයකු වන යසසිරි කස්තුරිආරච්චිගේ අත්සන ව්‍යාජ ලෙස යොදා සකස් කළ ව්‍යාජ ඔප්පුවක් උපයෝගී කරගනිමින් රුපියල් ලක්ෂ 900ක ණය මුදලක් ලබාගත් බව පෙන්වා ණය බැඳුම්කරයක් සඳහා සුරැකුම් ලෙසට ලබා නොදුන් ඉඩමක් පවරා ගැනීමක් පිළිබඳව සිදු කරන විමර්ශන පිළිබඳව කරුණු දැක්වීම සඳහා ලබන ජූලි 30 වැනිදා අධිකරණය හමුවේ පෙනී සිටින ලෙස දන්වා අපරාධ පරීක්‍ෂණ දෙපාර්තමේන්තුවේ විමර්ශන නිලධාරියා වෙත නොතීසි යැවීමට කොටුව මහෙස්ත්‍රාත් නිලුපුලී ලංකාපුර මෙනවිය නියෝග කළාය.
අගතියට පත් ඉඩම් හිමිකරු වන යසෝදා සමූහ ව්‍යාපාරයේ යසසිරි කස්තුරිආරච්චි මහතා වෙනුවෙන් පෙනීසිටි ජ්‍යෙෂ්ඨ නීතිඥ ගුණරත්න වන්නිනායක මහතා මෝසමක් මගින් නඩුව කැඳවා කළ කරුණු දැක්වීම් සළකා බැලූ මහෙස්ත්‍රාත්වරිය එම නියෝගය කළාය.
සිය සේවාදායකයා එකී වංචාව සම්බන්ධයෙන් අපරාධ පරීක්‍ෂණ දෙපාර්තමේන්තුවට පැමිණිලි කොට දීර්ඝ කාලයක් ගතවී ඇති බවත්, ඔහු ප්‍රශ්නගත බැංකුව සමග වසර ගණනාවක් තිස්සේ ණය ගනුදෙනු කළ අයකු බවත්, එකී ණය ගනුදෙනු ගෙවා අවසන් කොට තිබියදීත් ණය බැඳුම්කරයක් ලෙස ඉදිරිපත් කොට තිබූ අක්කර 48ක ඉඩමක් බැංකුවේ නීති නිලධාරිනියක ලෙස කටයුතු කළ ප්‍රසිද්ධ නොතාරිස්වරියක් විසින් ලියන ලද ඔප්පුවක් උපයෝගී කරගෙන එලෙස පවරාගෙන ඇතැයි නීතිඥ ගුණරත්න වන්නිනායක මහතා අධිකරණයට පැවසීය.
සිය සේවාදායකයා ලබා ගත්තේ යැයි කියන එකී රුපියල් ලක්ෂ 900ක කාගේ නමින් කුමන ගිණුමකට තැන්පත් කළේ දැයි කරුණු පවා මේ දක්වා අනාවරණය කිරීමට අදාළ බැංකුව අසමත් වී ඇතැයිද එහිදී අධිකරණයට පෙන්වා දුන් නීතිඥ ගුණරත්න වන්නිනායක මහතා එකී ඔප්පුව යතුරුලියනය කිරීම සඳහා යතුරුලියන හතරක් හා පිටෙන් පිට යතුරුලියන කඩදාසි වර්ග කීපයක් යොදාගෙන ඇති රජයේ රස පරීක්‍ෂකවරයාගේ වාර්තාව අනුව පැහැදිලි වන්නේ යැයිද පෙන්වා දුන්නේය. 1996.01.24 වැනිදා එකී ව්‍යාජ ඔප්පුව සකස්කොට ඇති බවත් අදාළ ව්‍යාපාරිකයාගේ දෙමාපියන් එකී දේපළ උකසින් නිදහස් කරගෙන ඇත්තේ 1998 වසරේදී වන්නේ යැයිද අධිකරණයට පෙන්වා දුන් නීතිඥ ගුණරත්න වන්නිනායක මහතා එකී ව්‍යාජ ඔප්පුව ලියාපදිංචි කිරීම සඳහා අදාළ නොතාරිස්වරිය ඉඩම් රෙජිස්ට්‍රාර් කාර්යාලයට යවා ඇත්තේ ඔප්පුවේ සඳහන් දිනට වසර එකහමාරකට පමණ වන්නේ යැයිද වැඩිදුරටත් පැවසීය.
ඒ. ජේ. ඒ. අබේනායක
