ඇඹිලිපිටිය නොමේරු ළදරු ඒකකයෙන් ඇසෙන කතා…
ඒ සඳහා තව පහසුකම් තියෙනවා නම් අපිට මේ තත්ත්වය වර්ධනයක් දකින්න පුළුවන්. කෘත්‍රීම ස්වසනය ලබාදෙන මැෂින් (වෙන්ටලේටඩ්) තුනයි තියෙන්නේ, තව තුනක්වත් අපිට තියෙනව නම් අපේ සේවය තවත් වැඩි කළ හැකියි. මේ මැෂින් විතරක් තිබුණට මදි
ඇඹිලිපිටිය මහ රෝහලේදී සති 28 න් ඉපදුණු දරුවන් ඉතාමත් සුවෙන් නිරෝගීව රෝහලෙන් නිවසට ගෙනයා හැති තත්ත්වයේ සිටින බව වෛද්‍යවරු පවසති. සති 40 ක් මව් කුසේ වර්ධනය විය යුතු දරුවකු සති 28න් බිහි වූයේ නම් ඔවුන් අඩු පහසුකම් සහිත ඇඹිලිපිටිය වැනි රෝහලක මේ ආකාරයෙන් ඉතා සුවයෙන් නිරෝගී තත්ත්වයට පත්කිරීමට වෛද්‍යවරු සහ කාර්ය මණ්ඩලයේ දැඩි කැපවීමෙන් සිදු කර ඇත.
එච්.එම්. මාධවී සුනේත්‍රා මධුෂානී ඇඹිලිපිටිය 98 ප්‍රදේශයේ පදිංචි මවකි. ඇයගේ සැමියා යුද හමුදා නිලධාරියකු ලෙස සේවය කරයි. ඇයට නිවුන් දරුවන් ලැබුණේ දරුගැබ නිසි වයස සම්පූර්ණ කර නොවේ. ඒ මාස 7ක් වැනි කාලයකදීය. මේ සම්බන්ධයෙන් වෛද්‍යවරු කියා සිටින්නේ මෙසේ උපදින දරුවන් ජීවත් කිරීමේ සම්භාවිතාව අඩු බවත් එසේ ජීවත් වන්නේ නම් ඔවුන් ජීවිත කාලයේම විශාල ආබාධ එනම් ස්නායු ආබාධ ඇති විය හැකි බවයි.
මෙසේ ඉපදුණු නිවුන් දරුවන් මේ වන විට ඉතාමත් සුවෙන් සිටී. දැන් ඔවුන් ගෙදර ගෙන යා හැකි සෞඛ්‍ය තත්ත්වයෙන් කිසිදු අතුරු ආබාධයක් නොමැතිව නිරෝගී සුවයෙන් සිටින බව මේ දරුවන් භාරව ප්‍රතිකාර කරන ඇඹිලිපිටිය මහ රෝහලේ ළමා රෝග විශේෂඥ වෛද්‍ය ජයජීව සුගතපාල මහතා කියයි. මවද මේ වන විට නිරෝගී සුවයෙන් සිටී. වෛද්‍යවරු පවසන්නේ රෝහලේ නාරි වෛද්‍යවරයාගේ සිට කාර්ය මණ්ඩලයේ දැඩි කැපවීම හා අවධානය නිසාම මේ ආකාරයෙන් දරුවන් බේරාගැනීමට හැකියාව ලැබී ඇති බවයි.
රෝහල තුළ නොමේරූ ළදරු ඒකකයේ විශාල අඩුපාඩුකම් රැසක් තිබෙන බවද වෛද්‍යවරු පවසති. එම නිවුන් දරුවන් පමණක් නොව තවත් ඒ ආකාරයෙන් දරුවන් බොහෝ ප්‍රමාණයක් අඩු පහසුකම් යටතේ වෛද්‍යවරුන් සහ කාර්ය මණ්ඩලයේ කැපවීම මත නොමේරූ ඒකකයේ සාර්ථකව ප්‍රතිකාර ලබා නිවෙස් බලා ගොස් තිබේ.
දරුවෙක් වර්ධන සම්පූර්ණය වෙන්න මවු කුස තුළ සති 40ක් ඉන්න ඕනෑ. මේ දරුවන් සති අඩු ගාණෙන් හම්බවෙනව කියන්නේ දරුවා ජීවත්වීමේ අවදානමකට ලක්වෙනවා. ඒකෙනුත් සති 28/29 කියන්නේ ඉතාමත් නොමේරූ තත්ත්වයේ දරුවන්. දරුවගේ ස්වසන පද්ධතිය, ආහාර ජීර්ණ පද්ධතිය, වකුගඩු අන්තරාසර්ග පද්ධතිය, හෘදය වස්තුව මේ හැම දෙයින්ම දරුවා කුස තුළ වර්ධනය වෙලා දරුවන් තවදුරටත් මෝරන්න ඕනෑ. මේ දරුවන් එළියට ගත්ත කියන්නේ ඉතාමත් ප්‍රවේසමෙන් ජීවත් කරන්න වෛද්‍යවරුන්ට කාර්ය මණ්ඩලයට ලොකු පරිශ්‍රමයක් දරන්න වෙනවා. මේ දරුවන්ගේ උෂ්ණත්ව පාලනය ප්‍රශස්ත මට්ටමින් පවත්වා ගෙන යා යුතුයි. මේ ඔක්කොම පාලනය කරගෙන යද්දී පිටතින් එන බාධක එනවා. පිටතින් එන විෂ බීජ විශාල ගැටලුවක් වෙනවා. මේ සියලුම දේවල් පාලනය කිරීම තමයි ළමා දැඩි සත්කාර ඒකකයක තියෙන අභියෝගය.
ඇඹිලිපිටිය වැනි දුර ප්‍රදේශයක පහසුකම් අඩු රෝහලක මේ වගේ දරුවන් බේරා ගැනීමයි වැදගත්කම. ඇඹිලිපිටිය මහ රෝහලට දිස්ත්‍රික්ක කිහිපයකින්ම දරුවන් ඇතුළත් කරනවා. වෙනත් රෝහල්වලින් නොමේරූ ළදරු ඒකකයට අපි දරුවන් ගන්නවා. රත්නපුර, මාතර, මොනරාගල, හම්බන්තොට යන දිස්ත්‍රික්කවලින් මේ රෝහලට රෝගීන් ඇතුළත් වෙනවා. අපි තංගල්ල රෝහලින් පවා දරුවන් ලබාගන්නවා මේ රෝහලට. අනාගතයේදී මේ තත්ත්වය අපිට වැඩි කරන්නත් පුළුවන්.
ඒ සඳහා තව පහසුකම් තියෙනවා නම් අපිට මේ තත්ත්වය වර්ධනයක් දකින්න පුළුවන්. කෘත්‍රීම ස්වසනය ලබාදෙන මැෂින් (වෙන්ටලේටඩ්) තුනයි තියෙන්නේ, තව තුනක්වත් අපිට තියෙනව නම් අපේ සේවය තවත් වැඩි කළ හැකියි. මේ මැෂින් විතරක් තිබුණට මදි. ඒකට මේ ඉන්න කාර්ය මණ්ඩලයත් එක්ක අවශ්‍ය ගෑස්, ඔක්සිජන්, ඉඩකඩ කියන දේ තිබුණ නම් අපිට පුළුවන් අපේ සේවය තවත් පුළුල් කරන්න.
ඇඹිලිපිටිය මහ රෝහලේ නොමේරූ ළදරු ඒකකය පහසුකම් අඩු සහ කුඩා ඉඩ ප්‍රමාණයක පිහිටීම හේතුවෙන්ම මෙහි කටයුතු කිරීමේදී මේ වන විට දැඩි දුෂ්කරතාවයන්ට පත්ව ඇත. බලධාරීන් මේ සම්බන්ධව සොයා බලා කටයුතු කළ යුතු කාලය එළඹ ඇත.
ඕමල්පේ – ප්‍රගීත් ජනක
