කඩවත නගරයේ පොලිසියට යාබදව පිහිටි ඉන්ධන පිරවුම් හලේ සිදුව තිබූ රුපියල් විසිදෙලක්ෂ අසූහතර දහසක මුදල් සොරකම සම්බන්ධයෙන් එම ඉන්ධන පිරවුම් හලේ පොම්පකරුවකු ලෙස සේවයේ නිරතව සිට ඇති 31 හැවිරිදි පුද්ගලයා කඩවත පොලිසියේ නිලධාරීන් විසින් ඉකුත් 22 වැනිදා මධ්යම රාත්රියේ කඩවත, ගෝනහේන ප්රදේශයේ සැකකරුගේ නිවසේ කාමරයක ඇඳක් යට සැඟව සිටියදී පොලිස් අත්අඩංගුවට ගෙන ඇත.
අත්අඩංගුවට පත් සැකකරු ඉකුත් 23 වැනිදා මහර මහෙස්ත්රාත් අධිකරණයට ඉදිරිපත් කිරීමෙන් පසුව ජූලි මස 07 වැනිදා දක්වා රක්ෂිත බන්ධනාගාර ගත කිරීමට මහෙස්ත්රාත්වරිය නියෝග කර ඇත.
සැකකරු අන්තර්ජාලය හරහා මුදල් යොදවා කරන සූදු ක්රීඩාවට ඇබ්බැහි වූවකු බවත්, ඉන්ධන පිරවුම් හලෙන් සොරාගත් රුපියල් 22,84,000ක මුදලද එම සූදුවට යොදවා ඇති බව සැකකරු සන්තකයේ තිබූ මුදල් ගෙවූ රිසිට් පත්වලින් තහවුරු වූ බවත් පොලිසිය පැවසීය. පසුගිය 19 වැනිදා එම ඉන්ධන පිරවුම් හලේ කළමනාකරු විසින් කඩවත පොලිසියේ අපරාධ විමර්ශන අංශයට කළ පැමිණිල්ලකට අනුව විමර්ශන ආරම්භ කළ පොලිසිය පෞද්ගලික ඔත්තුකරුවන් යොදවමින් ඒ වනවිට ඉන්ධන පිරවුම්හලේ රැකියාව හැර පලාගොස් සිටි සැකකරු අත්අඩංගුවට ගැනීමට පැතිකඩ කීපයක් ඔස්සේ විමර්ශන සිදුකර ඇත.
ඒ අනුව සැකකරු පදිංචිව සිටි කඩවත ගෝනහේන ප්රදේශයේ කුලී නිවසේදීම ඔහු අත්අඩංගුවට ගැනීමට පොලිස් නිලධාරීන් සමත් වී ඇත.
අත්අඩංගුවට පත්වන මොහොතේ රුපියල් දහසක පමණ මුදලක් ඔහු සතුව තිබී ඇති අතර සේවා ස්ථානයෙන් මංකොල්ල කෑ මුදල් සියල්ල සැකකරු අන්තර්ජාල සූදු ක්රීඩාවට යෙදවූ බව ඒ සඳහා ලද කුවිතාන්සිද සාක්ෂි වශයෙන් ඉදිරිපත් කරමින් පොලිසියට ප්රකාශ කර ඇත.
පළමු විවාහයෙන් වෙන්වී අනියම් බිරිඳ සමඟ ජීවත් වන බව කියන මෙම සැකකරු ගෝනහේන ප්රදේශයේ කුලී පදනම මත ලබාගත් නිවසක පදිංචිව සිට ඇත.
කඩවත පොලිසියේ වැඩබලන ස්ථානාධිපති ප්ර.පො.ප. විතානආරච්චි මහතාගේ මූලික උපදෙස් මත අපරාධ අංශයේ ස්ථානාධිපති පො.ප. සමරනායක, පො.කො. වරුන් වන (66735) සම්පත්, (40423) ලැනරෝල්, (76914) අසේල, (94038) ජයවික්රම, (101368) උදයංග යන නිලධාරීන් විසින් සැකකරු අත්අඩංගුවට ගෙන ඇත.
කැලණිය – මංගලා මදුරප්පෙරුම