ජාජබ – සර්වජන හැර සියලු දෙනා පිටවෙති:
දැරණියගල ප්‍රාදේශීය සභාවේ සභාපතිවරයකු හා උප සභාපතිවරයකු තෝරා ගැනීම සඳහා සබරගමුව පළාත් පාලන කොමසාරිස් කීර්ති බණ්ඩර මහතාගේ ප්‍රධානත්වයෙන් ඊයේ දින (23දා) දැරණියගල ප්‍රාදේශීය සභා ශාලාවේදී රැස්වීම පැවැත්වුණි. මෙහිදී සභාපති තනතුර සඳහා ජාතික ජනබලවේගයෙන් අනුරාධ නුවන් චන්ද්‍රසිරි මන්ත්‍රීවරයාගේ නම යෝජනා වුණු අතර ජනබලවේගය පක්ෂයෙන් ඉන්දික ප්‍රසාද් රණසිංහ මහතාගේ නම යෝජනා විය. අනතුරුව සභාපතිවරයකු තෝරා ගැනීම සඳහා රහස් ඡන්දයක් ද විවෘත ඡන්දයක් ද යන්න පිළිබඳව රහස් ඡන්දයක් පවත්වන ලදී. එහිදී රහස් ඡන්දය වෙනුවෙන් එකොළොස් දෙනකු ඡන්දය ප්‍රකාශ කර තිබූ අතර විවෘත ඡන්දය සඳහා දසදෙනකු ඡන්දය ප්‍රකාශ කර තිබුණි.
අවසානයේ ජාතික ජනබලවේගය පක්ෂය නියෝජන කළ මන්ත්‍රීවරු අට දෙනා හා සර්වජනබලය පක්ෂ නියෝජනය කරන මන්ත්‍රීවරයා හැර සියලු දෙනාම සභා ශාලාවෙන් පිටව ගියහ. ඒ අනුව පළාත් පාලන කොමසාරිස්වරයා විසින් සභාව විනාඩි තිහකට කල් තැබිණි.
විනාඩි 30 ක කාලය ඉක්ම ගිය පසු සභා ගැබෙන් පිටව ගිය මන්ත්‍රීවරු සභා ශාලාවට නොපැමිණීම හේතුවෙන් ඝන පූර්ණය නොමැතිකමින් සබරගමු පළාත් පාලන කොමසාරිස් කීර්ති බණ්ඩාර මහතා විසින් සභාපතිවරයා හා උප සභාපතිවරයා තෝරා ගැනීම යළි ඉදිරි දිනක දී සිදු කරන බව ප්‍රකාශයට පත් කිරීමෙන් අනතුරුව කටයුතු නිමාවට පත් විය. දැරණියගල ප්‍රාදේශීය සභාවේ මුළු මන්ත්‍රීවරුන් සංඛ්‍යාව විසි එක් දෙනෙකි.
ඔවුහු ජාතික ජනබලවේගය, සමගි ජනබලවේගය, එක්සත් පෙරමුණ, ශ්‍රී ලංකා පොදුජන පෙරමුණ, පොදුජන එක්සත් පෙරමුණ නියෝජනය කරති.
වසන්ත සමරවර්ධන බුලත්කොහුපිටිය සහ සෝමචන්ද්‍ර යකන්දාවල – දැරණියගල
