නොරොච්චෝලේ විදුලි බලාගාරයේ 3 වැනි ජනන යන්ත්‍රයේ අලුත්වැඩියා කටයුතු සඳහා ඊයේ (13දා) මධ්‍යම රාත්‍රියේ සිට එම යන්ත්‍රය ක්‍රියා විරහිත කරවීමට පියවර ගත් බව ලංකා විදුලිබල මණ්ඩලය සඳහන් කරයි.
ඒ අනුව අදාළ නඩත්තු කටයුතු අවසන් කිරීම සඳහා දින 25ක කාලයක් ගත වන බවත් මෙම ජනන යන්ත්‍රය අක්‍රීය කිරීමෙන් ජාතික විදුලි පද්ධතියට මෙගාවොට් 300ක විදුලි ධාරිතාවක් අහිමි වන බවත් එම මණ්ඩලය පවසයි.
පවතින වැසි තත්ත්වයත් සමග ජල විදුලි නිෂ්පාදනයට වැඩි අවස්ථාවක් පැවැතීම හේතුවෙන් මේ ආකාරයට විදුලි බලාගාර නඩත්තු කටයුතු සිදු කරන බව ද ලංකා විදුලි බල මණ්ඩලය සඳහන් කර සිටී.
කෙසේ වෙතත් නොරොච්චෝලේ පවතින ජනන යන්ත්‍ර දෙකක් ක්‍රියාකාරී මට්ටමේ පැවැතීම හේතුවෙන් විදුලිබල සැපැයීමට කිසිදු බාධාවක් නොමැති බව එම මණ්ඩලයේ මාධ්‍ය ප්‍රකාශක ධම්මික විමලරත්න මහතා පවසයි.
මේ අතර දැනට මාස 1 1/2ක කාලයක් අලුත්වැඩියා කරමින් පැවැති කැලණිතිස්ස සංයුක්ත බලාගාරය විදුලි ජනන කටයුතු සඳහා ඉදිරි දින කිහිපය තුළදී යළි එක් කිරීමට නියමිතව ඇත. ඉන් ජාතික විදුලිබල පද්ධතියට මෙගාවොට් 165ක ධාරිතාවක් එක් කිරීමට නියමිතය.
සුජීව තත්සර
