මැදපෙරදිග කලාපයේ උද්ගතව ඇති යුද උණුසුම හේතුවෙන් කලාපයේ ඇතැම් ප්‍රදේශවල ගුවන් අවකාශයන් වසා දැමීම හේතුවෙන් එම කලාප මඟහැරීම සඳහා ලන්ඩන් ඇතුළු යුරෝපීය ගුවන් මාර්ගවල වෙනස්කම් කීපයක් සිදුකිරීමට සිදුව ඇතැයි ශ්‍රීලන්කන් ගුවන් සේවය නිවේදනය කරයි.
අදාළ ගුවන් ගමන් මාර්ග වෙනස් කිරීම හේතුවෙන් යුරෝපය වෙත ක්‍රියාත්මක ගුවන් ගමන්හි කාලය දීර්ඝ වීමක් සිදුවිය හැකි බව ද ගුවන් සේවය සඳහන් කරයි.
මෙම තත්ත්වය මත ඊයේ (13දා) ලන්ඩන් සිට කොළඹ පැමිණි යූඑල් 504 ගුවන් යානය යළි මාර්ගගත කිරීම හේතුවෙන් ඉන්ධන පිරවීම සඳහා දෝහා වෙත හරවා යවනු ලැබිණි. එමෙන්ම බලපෑමට ලක්වූ ගුවන් අවකාශය මඟහැරීම සඳහා කොළඹ සිට පැරිස් දක්වා පියාසර කළ යූඑල් 501 යානයේ ද ගුවන් ගමන් මාර්ගය වෙනස් කිරීමට සිදුවූ බව ශ්‍රීලන්කන් ගුවන් සේවය වැඩිදුරටත් සඳහන් කර සිටී.
මේ පිළිබඳව වැඩි විස්තර ලබා ගැනීම සඳහා 1979 (ශ්‍රී ලංකාව තුළ) සහ +94117771979 (ජාත්‍යන්තරව) විමසීම් කළ හැකි බවත් වට්ස්ඇප් අංක +94744441979ත් භාවිත කළ හැකි බව ද දැනුම් දී තිබේ.
මේ අතර ජෝර්දානය ද සිය ගුවන් අවකාශයන් වෙනස් කිරීමට පියවර ගත් බව ඊයේ (13දා) නිවේදනය කළේය.
සුජීව තත්සර සහ ටී.කේ.ජී. කපිල – ගුවන්තොටුපොළ
