බුද්ධි තොරතුරු ලැබී තිබියදීත් පාස්කු ප්‍රහාර මාලාව වළක්වා ගැනීමට පියවර නොගැනීම සම්බන්ධයෙන් රාජ්‍ය බුද්ධි අංශ හිටපු ප්‍රධානි මේ වනවිට අනිවාර්ය නිවාඩු යවා ඇති ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතාට එරෙහිව නීතිමය පියවර ගන්නා ලස ඉල්ලා ගොනු කර ඇති පෙත්සම කඩිනමින් විභාගයට ගන්නා ලෙස පෙත්සම්කාර පාර්ශ්වය වෙනුවෙන් පෙනී සිටි නීතිඥ අර්විසා මීගල් මහත්මිය ඊයේ (12දා) අභියාචනාධිකරණයෙන් ඉල්ලා සිටියාය.
ඔහුට එරෙහිව දෙපාර්තමේන්තු මට්ටමින් විනය පරීක්ෂණයක් පැවැත්වීම එකී නීතිමය පියවර ගැනීමට කිසිදු බාධාවක් නොවන බවද නීතිඥවරිය කියා සිටියාය.
සමාජය හා සාමයික කේන්ද්‍රයේ අධ්‍යක්‍ෂ රොහාන් සිල්වා පියතුමා හා කොළඹ ෂැංග්‍රිලා හෝටලයට එල්ල කළ මරාගෙන මැරෙන බෝම්බ ප්‍රහාරයෙන් මියගිය තරුණයකුගේ පියා වන සුරාජ් නිලංග මහතා ගොනු කර තිබූ පෙත්සම මායාදුන්නේ කොරයා හා මහේන් ගොපල්ලව යන මහත්වරුන්ගෙන් සමන්විත විනිසුරු මඬුල්ල හමුවේදී කැඳවිණි. නිලන්ත ජයවර්ධන මහතාට එරෙහිව විනය පරීක්ෂණයක් පැවැත්වෙන බැවින් එම විනය පරීක්ෂණය අවසන් වනතුරු පෙත්සම් විභාගය කල්තබන ලෙස ඔහු වෙනුවෙන් පෙනී සිටි ජනාධිපති නීතිඥ චන්දක ජයසුන්දර මහතා අධිකරණයෙන් ඉල්ලා සිටියේය. වගඋත්තරකරුට එරෙහිව විනය පරීක්ෂණය ආරම්භ කොට ඇති බව නීතිපතිවරයා වෙනුවෙන් පෙනි සිටි නියෝජ්‍ය සොලිසිටර් ජනරාල් ජනක බණ්ඩාර මහතා අධිකරණයට තහවුරු කළේය.
විනය පරීක්ෂණය සහ අපරාධ පරීක්ෂණය අතර සම්බන්ධතාවක් නොමැති බවත් විනය පරීක්ෂණය ආරම්භ කළේ ද සිය සේවාදායකයන් මෙම පෙත්සම ගොනු කිරීමෙන් පසුව බවත් කියා සිටි පෙත්සම්කාර පාර්ශ්වය වෙනුවෙන් පෙනී සිටින නීතිඥවරිය විනය පරීක්ෂණයක් පවත්වා රාජකාරි පැහැර හැරීමට එරෙහිව විනයානුකූලව පියවර ගැනීම පෙත්සම්කරුවන්ගේ එක් ඉල්ලීමක් පමණක් බව පැවැසුවාය.
“ඇයි හදිස්සි වේනනේ විනය පරීක්ෂණයේ නියෝගය එනකම් බලමු නේ” දැයි අභියාචනාධිකරණ විනිසුරු මඬුල්ල පෙත්සම්කාර පාර්ශ්වයේ නීතිඥවරියට ප්‍රකාශ කළේය.
“ස්වාමිනී මේක 2019 වසරේදී සිදුවූ දෙයක්. නමුත් මේ වනතුරු එම වගඋත්තරකරුට එරෙහිව අපරාධ පරීක්ෂණයක් ආරම්භ කරලා නැහැ” යැයි නීතිඥ අර්විසා ටීගල් මහත්මිය විනිසුරු මඬුල්ලට පැවැසුවාය. නිලන්ත ජයවර්ධනට එරෙහිව අපරාධ නඩුවක් ගොනු නොකිරීමට නීතිපතිවරයා තීරණය කර ඇත්නම් එකී තීරණය අවලංගු කරනා නියෝගයක් කරනා ලෙසට ද නීතිඥවරිය විනිසුරු මඬුල්ලෙන් ඉල්ලා සිටියාය. සිය දෙපාර්තමේන්තුව එවැනි තීරණයක් ගෙන නොමැති බව නියෝජ්‍ය සොලිසිටර් ජනරාල් ජනක බණ්ඩාර මහතා අධිකරණයට පැවැසීය.
පාස්කු ප්‍රහාර මාලාව මැඬපැවැත්වීමට පියවර නොගැනීමට එරෙහිව නීතිපතිවරයා විසින් හිටපු පොලිස්පති පූජිත් ජයසුන්දර හා හිටපු ආරක්ෂක ලේකම් හේමසිරි ප්‍රනාන්දුට එරෙහිව නීතිපතිවරයා විසින් පවරා තිබූ නඩුවක නිලන්ත ජයවර්ධන පැමිණිල්ලේ සාක්‍ෂිකරුවකු ලෙස නම් කර තිබූ බවත් යමකුට එරෙහිව අපරාධ නඩුවක් ගොනු කිරීමට නම් ඔහුට එරෙහිව ප්‍රමාණවත් සාක්‍ෂි ඇත්දැයි නඩු මෙහෙයවන නීතිපතිවරයා සීහිමට පත්විය යුතු බවත් එහිදී අධිකරණයට පැවැසූ නියෝජ්‍ය සොලිසිටර් ජනරාල්වරයා නිලන්ත ජයවර්ධන අපරාධ නඩුවක විත්තිකරුවකු කරන්නේ ද නැති ද කියා නීතිපති දෙපාර්තමේන්තුව තවම තීරණය කර නැතැයිද වැඩිදුරටත් පැවැසීය.
ඒ.ජේ.ඒ. අබේනායක
