විපක්ෂය විසින් බලය පිහිටුවන පළාත් පාලන ආයතනවල ඉදිරි කටයුතු සාර්ථකව සිදු කිරීම සඳහා විපක්ෂයේ පක්ෂවලින් ජාතික කමිටුවක්ද පත්කර ගුණාත්මක සේවයක් ලබාදීමට කටයුතු කරන බව පොදුජන එක්සත් පෙරමුණේ නියෝජිත ලසන්ත අලගියවන්න මහතා ඊයේ (12 දා) පැවසීය.
විපක්ෂයට බලය පිහිටුවිය හැකි පළාත් පාලන ආයතනවල එක්ව බලය පිහිටුවීම පිළිබඳව විපක්ෂයේ පක්ෂ 04ක ප්‍රධානීන් ඊයේ (12 දා) සවස කොළඹ එන්.එම්. පෙරේරා මධ්‍යස්ථානයේදී ඒකාබද්ධ මාධ්‍ය හමුවක් පවත්වනු ලැබිණ. ඒ සඳහා සමගි ජන බලවේගය ජාතික සංවිධායක තිස්ස අත්තනායක, එජාප මහලේකම් තලතා අතුකෝරළ, ශ්‍රී ලංකා පොදුජන පෙරමුණේ මහ ලේකම් සාගර කාරියවසම්, පොදුජන එක්සත් පෙරමුණේ ලසන්ත අලගියවන්න යන මහත්වරු මේ සඳහා සහභාගී වී සිටියහ.
එහිදී අදහස් දැක්වූ ලසන්ත අලගියවන්න මහතා මෙසේ කියා සිටියේය.
පළාත් පාලන ආයතන විශාල සංඛ්‍යාවක විපක්ෂයට බලය තහවුරු කරගැනීමට අවස්ථාව හිමිව තිබෙනවා. ඒ සඳහා විපක්ෂයේ අපි එකමුතුවක් ඇති කරගෙන එම ආයතනවල බලය පිහිටුවා ගැනීමේ හැකියාව ලැබී තිබෙනවා. ඒ වගේම අපි මේ පළාත් පාලන ආයතනවල බලය පිහිටුවා සභාපති, උප සභාපතිවරුන් පත්කළ පසුව අපේ මේ එකමුතුව අවසන් වෙන්නේ නෑ. ඒ පිහිටුවන ලද පළාත් පාලන ආයතනවල ඉදිරි කාලයේදී ඉතා ඉහළ ගුණාත්මක සේවයක් අදාළ බල ප්‍රදේශවල ජනතාවට ලබාදීම වෙනුවෙනුත් අපේ දේශපාලන පක්ෂ ඒකාබද්ධ වී වැඩ කරනවා. ඒ ආයතනවල ඉදිරි කටයුතු සොයා බැලීම සඳහාත් අඛන්ඩව කටයුතු කිරීම සඳහා ජාතික කමිටුවක් පත් කරලා දිස්ත්‍රික් මට්ටමින් ඒ අධීක්ෂණ කටයුතු සිද්ධ කරනවා.
මෙහිදී විපක්ෂය නියෝජනය කරමින් සහභාගී වූ අනෙක් නියෝජිතයන්ද අදහස් දැක්වූහ.
අකිත පෙරේරා
