පේරාදෙණිය හා මහනුවර දුම්රිය ස්ථානය අතර දුම්රිය මාර්ගයේ සිදු වූ ගිලාබැසීමක් හේතුවෙන් එම මාර්ගයේ පේරාදෙණිය හා මහනුවර අතර දුම්රිය ගමනාගමනය අත්හිටුවීමට දුම්රිය දෙපාර්තමේන්තුව ඊයේ (11දා) පියවර ගත්තේය.
මහනුවර උසාවිය අසල දුම්රිය මාර්ගයේ අඩි 15 ක් පමණ ගැඹුරට විශාල ගිලා බැසීමක් සිදු වී ඇති අතර මේ හේතුවෙන් මහනුවර ප්‍රධාන දුම්රිය මාර්ගය ඔස්සේ මහනුවරට පැමිණි දුම්රිය මහනුවර මුල්ගම්පොළ ප්‍රදේශයෙන් නතර කිරීමටද, මහනුවර සිට ගමන් ආරම්භ කරන දුම්රිය අත්හිටුවීමට ද පියවර ගෙන තිබුණි.
මහනුවර ප්‍රදේශයට ඇද හැලෙන අධික වැසි හේතුවෙන් දුම්රිය මාර්ගය මෙලෙස ගිලා බැසීමට ලක් වී ඇත. මෙම තත්ත්වය කඩිනමින් යථාවත් කිරීමට කටයුතු යොදන බව මහනුවර දුම්රිය ස්ථානයේ නිලධාරියෙක් පැවසීය.
කෙසේ වෙතත් බදුල්ල බලා ධාවනය වන දුම්රියන් බාධාවකින් තොරව ධාවනය වේ.
සමන්ති වීරසේකර, ගුන්නෑපාන-ජානක සම්පත් බණ්ඩාර
