පාවහන් හා සම්භාණ්ඩ නිෂ්පාදකයන්ගේ සංගමයේ සභාපති
පාවහන් මුවාවෙන් මත්කුඩුත් ගේනවා
රටට අවශ්‍ය පාවහන් රට තුළම හදනවා:
පාවහන් ගෙන්වන මුවාවෙන් රේගුව හරහා රට තුළට මත්කුඩු ඇතුළු තහනම් ද්‍රව්‍ය රැගෙන එන බවත් රටට අවශ්‍ය පාවහන් රට තුළම නිපදවන නිසා පාවහන් ආනයනය නතර කරන ලෙසත් පාවහන් හා සම්භාණ්ඩ නිෂ්පාදකයන්ගේ සංගමයේ සභාපති නෙවිල් පෙරේරා මහතා බලධාරීන්ගෙන් ඉල්ලා සිටී.
ජාවාරම්කරුවන් විසින් මත්කුඩු ඇතුළු තහනම් ද්‍රව්‍ය පාවහන් මුවාවෙන් රටට ගෙනඒම නිසා සැබෑ පාවහන් නිෂ්පාදකයන් ලැජ්ජාවට පත්වන බවද නෙවිල් පෙරේරා මහතා කීය.
මෙවැනි ජාවාරම්කරුවකු ලෙස සැකකරන පුද්ගලයකු පසුගිය 3දා කුෂ් නමැති මත්ද්‍රව්‍ය රේගුව හරහා රටට ගෙනඒමට උත්සාහ කළ අවස්ථාවේදී අත්අඩංගුවට ගෙන තිබූ බවත් එම පුද්ගලයා පාවහන් නිෂ්පාදකයකු බවට හඳුන්වාදී ඇතත් ඔහු පාවහන් නිෂ්පාදකයකු නොව ආනයනකරුවකු බව දැනගන්නට ලැබී ඇති බවත් ඔහු කීය.
මෙවැනි පුද්ගලයන් නිසා සැබෑ පාවහන් ව්‍යාපාරිකයන් දැඩි අපහසුතාවට පත්වන බවත් රටට පාවහන් ආනයනය කිරීමට කාට හෝ අවශ්‍යතාවක් තිබේ නම් ඔවුන්ට නීත්‍යනුකූලව පාවහන් ආනයනය කිරීමට බලපත්‍රයක් අනිවාර්ය කරන ලෙසත් ඒ මහතා ඉල්ලා සිටියේය. එසේ නොකර ඕනෑම අයකුට පාවහන් ආනයනය කිරීමට හැකි නිසා පාවහන් ගෙන්වන මුවාවෙන් විවිධ ද්‍රව්‍ය රටට ගෙන්වන බවක් මෑතකදී පාවහන් නමින් කහ කන්ටේනරයක් ගෙන්වා තිබියදී රේගුව මගින් සොයාගෙන තිබූ බවත් ඔහු කීය. පාවහන් මුවාවෙන් ගෙන්වා තිබූ එවැනි කන්ටේනර්වල තිබී අවස්ථා කිහිපයකදීම තහනම් ද්‍රව්‍ය සොයාගෙන ඇති බවද හෙතෙම පැවැසීය.
මෙවැනි ජාවාරම් නිසා රටට ලැබිය යුතු ආදායම අහිමි වන බව කී ඒ මහතා රටේ බිත්තර, සහල්, බඩඉරිඟු ඇතුළු විවිධ භාණ්ඩ සම්බන්ධයෙන් ගැටලු මතුවුවත් පාවහන් නැතැයි කුමන හෝ ප්‍රදේශයකින් විරෝධතාවක් වාර්තා වී නැතැයි ද කියා සිටියේය.
එම නිසා රටේ බලධාරීන්ගෙන් නැවතත් ඉල්ලා සිටින්නේ රටේ අවශ්‍යතාවයට ප්‍රමාණවත් ලෙස පාසල් පාවහන් ඇතුළු අනෙකුත් පාවහන් රටේ නිෂ්පාදනය කරන බැවින් නිමි පාවහන් රටට ගෙන්වීම නවතා දැමීමෙන් ඒ මුවාවෙන් රටට අනීතික ද්‍රව්‍ය ගෙනඒම ද වළක්වාගත හැකි බව යැයි ද ඒ මහතා පැවැසීය.
චමින්ද සිල්වා
