කැබිනට් ප්‍රකාශක
ලබන වර්ෂය (2026) සඳහා වන අයවැය මේ වසරේ (2024) නොවැම්බර් මස මුල් සතියේදී ඉදිරිපත් කිරීමට නියමිත බව කැබිනට් ප්‍රකාශක සහ ජනමාධ්‍ය හා සෞඛ්‍ය ඇමැති වෛද්‍ය නලින්ද ජයතිස්ස මහතා පැවසීය.
2026 අයවැයට අදාළ විසර්ජන පනත් කෙටුම්පත ඔක්තෝබර් පළමු සතියේදී පාර්ලිමේන්තුවට ඉදිරිපත් කරන බවත් අයවැය තෙවනවර කියවීමේ විවාදය, 2025 නොවැම්බර් සහ දෙසැම්බර් මාසවලදී පැවැත්වීමට හැකිවන අයුරින් අයවැය සකස් කිරීමට ඇමැති මණ්ඩල අනුමැතිය ලැබුණු බවත් ඇමති නලින්ද ජයතිස්ස මහතා කීවේය.
ඊයේ (02දා) පැවැති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී ඇමැතිවරයා මේ බව කීවේය.
‘නිෂ්පාදන ආර්ථිකයක් සහ සෑම දෙනාටම ආර්ථික සංවර්ධනයට දායකකර ගැනීම’ යන තේමාව පදනම් කර ගනිමින් 2026 – 2030 රාජ්‍ය රාමුව හා රාජ්‍ය මූල්‍ය ක්‍රමෝපාය ප්‍රකාශය සහ ජාතික ප්‍රතිපත්ති රාමුව වන ‘පොහොසත් රටක් – ලස්සන ජීවිතයක්’ යන ප්‍රතිපත්ති රාමුවට අනුගතව 2026 වර්ෂය සඳහා අයවැය සකස් කිරීමට අපේක්ෂිත බවද ඇමැතිවරයා කියා සිටියේය.
2024 අංක 44 දරන රාජ්‍ය මූල්‍ය කළමනාකරණ පනතේ විධිවිධානයන්ට සහ රජයේ ප්‍රතිපත්ති ප්‍රකාශයට අනුකූලව අමාත්‍යාංශ විෂය පඨයන් යටතේ ඒ ඒ අමාත්‍යාංශ විසින් හඳුනාගනු ලබන ව්‍යාපෘති හා වැඩසටහන් ක්‍රියාත්මක කිරීම පිණිස අවශ්‍ය ප්‍රතිපාදන සලසාදීම සඳහා සියලු අමාත්‍යාංශ වෙතින් යෝජනා ලබාගැනීමට නියමිත බවද ඇමති නලින්ද ජයතිස්ස මහතා තවදුරටත් කීවේය.
ශ්‍යාම් නුවන් ගනේවත්ත
