බෝනොවන රෝග වර්ධනය මෙරට සෞඛ්‍ය සේවාවටත් මහජන සෞඛ්‍යයටත් විශාල අභියෝගයක්. ලෝක සෞඛ්‍ය සංවිධානයට අනුව මුඛ රෝග ගෝලීය වශයෙන් බෝ නොවන රෝගී තත්ත්වයක්. මෙම සංකීර්ණ
අභියෝගයට මුහුණ දීම සඳහා ජනතාවගේ මුඛ සෞඛ්‍ය පිළිබඳව ශ්‍රී ලංකා දන්ත වෛද්‍ය සංගමය සමග තමන් ඉතා සමීපව කටයුතු කරනවා යැයි සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා ප්‍රකාශ කළේය.
අමාත්‍යවරයා එසේ සඳහන් කළේ ශ්‍රී ලංකා දන්ත වෛද්‍ය සංගමයේ 92 වැනි වාර්ෂික විද්‍යාත්මක සැසිවාරයට එක්වෙමින් කොළඹ සිනමන් ලයිෆ් හෝටලයේ පැවති උත්සවයකදීය.
‘නවෝත්පාදන සහ ඩිජිටල් පරිවර්තනය වැලඳ ගැනීම’ තේමා කර ගනිමින් පැවති මෙම උත්සවයේදී අමාත්‍යවරයා වැඩිදුරටත් මෙසේ ද පැවසීය.
සෞඛ්‍ය හා ජනමාධ්‍ය අමාත්‍යවරයා ලෙස සන්නිවේදනයේ පරිවර්තනීය ශක්තිය තමන් හඳුනන බවත් මුඛ සෞඛ්‍ය, පෝෂණය, මුඛ පිළිකා වැළැක්වීම සහ දන්ත සෞඛ්‍යයට හානිකර පුරුදුවල අවදානම පිළිබඳව බලපෑම් සහිතව මහජනයා දැනුවත් කිරීමේ ව්‍යාපාර ක්‍රියාත්මක කිරීම සඳහා ශ්‍රී ලංකා දන්ත වෛද්‍ය සංගමය හා අනෙකුත් හවුල්කරුවන් සමග එක්ව කටයුතු කරන බව අමාත්‍යවරයා පැවසීය.
විද්‍යා හා තාක්ෂණ අමාත්‍ය වෛද්‍ය ක්‍රිෂාන්ත අබේසේන, ශ්‍රී ලංකා දන්ත වෛද්‍ය සංගමයේ සභාපති මහාචාර්ය රුවන් ජයසිංහ, ශ්‍රී ලංකා දන්ත වෛද්‍ය සංගමයේ සභාපති මහාචාර්ය හේමන්ත අමරසිංහ හා දන්ත වෛද්‍ය සංගමයේ සාමාජිකයන් විශාල පිරිසක් මෙම අවස්ථාවට එක්ව සිටියහ.
ධම්මික සල්වතුර
