මාතලේ දිස්ත්‍රික්කයේ පොල් ගස්වල ඇති පොල්ගෙඩි තුළ පවතින තත්ත්වය ඛනිජ ඌනතාවයක් බවට උපකල්පනය කරන බව පොල් පර්යේෂණායතනයේ සභාපති මහාචාර්ය අජිත් ජයවීර මහතා ‘දිවයින’ ට ඊයේ (27දා) පැවැසීය.
මාතලේ පොල් ඵලදාව පහතට යන මැයින් ඊයේ ‘දිවයින’ පුවත්පතේ පළවූ ප්‍රවෘත්තියට අදාළව තොරතුරු විමසීමේදී මහාචාර්යවරයා එසේ කියා සිටියේය.
තවදුරටත් කතා කළ මහාචාර්යවරයා මෙසේද කීය.
“පොල් ගහේ ඇට්ටි හැලෙන්නෙ පොටෑසියම් ඌනතාවයක් නිසා වෙන්න පුළුවන්. තව නියඟය නිසා පොල් වැටෙන්නත් පුළුවන්. බෝරෝන් ඛනිජ ඌනතාවය නිසා පොල් වැටෙන්නත් පුළුවන්. කොහොම වුණත් මේ මාතලේ ප්‍රදේශයේ එක් පැත්තක පොල් ගස්වලට බලපා ඇති මේ තත්ත්වයට හේතුව කෘමි හානියක්ද? ඛනිජ ඌනතාවයක්ද? කියලා සොයන්න පාංශු අධ්‍යයනයක් කරන්න බලාපොරොත්තු වෙනවා. මීට අමතරව පොල් ගස්වල ශාඛ පත්‍ර කොටස් අරන් විශ්ලේෂණය කරනවා.
පොල්ගෙඩි පුහුවෙන එක ජානමය ලක්ෂණ වෙන්න පුළුවන්. හරියටම මේ තත්ත්වයට හේතුව ඉදිරියේදී පැහැදිලි කරන්න බලාපොරොත්තු වෙනවා.
ප්‍රදීප් ප්‍රසන්න සමරකෝන්
