“මගේ වසර 50 ක දේශපාලනයේදී මා හිටියේ එක කඳවුරක. එක ප්‍රතිපත්තියක. මම පක්ෂ දේශපාලනය තුළ මා දැරූ ක්‍රියාකාරී වගකීම්වලින් ඉවත් වුණත්, වෙනත් පක්ෂවලට මාරුවෙන්නට, පනින්නට මගේ අදහසක් නැහැ. වගකිවයුතු ශ්‍රී ලාංකික පුරවැසියෙකු ලෙස ජගත් පුරවැසියෙකු ලෙස යහපත් රටක්, යහපත් ලෝකයක් සඳහා මගේ දායකත්වය ශක්ති ප්‍රමාණයෙන් ලබාදෙන්නට උත්සාහ කිරීම මගේ අපේක්ෂාවයි” යැයි හිටපු අමාත්‍යවරයකු හා හිටපු පාර්ලිමේන්තු මන්ත්‍රීවරයකු ද වූ ඉම්තියාස් බාකීර් මාකාර් මහතා පැවසීය.
ඒ මහතා ලියූ ‘හෘද සාක්ෂිය’ ග්‍රන්ථය එළිදැක්වීම ශ්‍රී ලංකා පදනම් ආයතනයේදී පැවති අවස්ථාවේ මේ බව සඳහන් කළේය. අතිපූජනීය මහා සංඝරත්නය ද හිටපු කථානායකවරුන් වූ කරු ජයසූරිය, මහින්ද යාපා අබේවර්ධන, විපක්ෂ නායක සජිත් ප්‍රේමදාස යන මහත්වරු ඇතුළු දේශපාලනඥයන් ඇතුළු විශාල පිරිසක් ඊට එක්ව සිටියහ.
එහිදී කතා කළ බාකීර් මාකාර් මහතා:
මේ පොත එළිදැක්වීමේ දී අදහස් දැක්වූ ඔස්ටින් ප්‍රනාන්දු, පාලිත ප්‍රනාන්දු, සාලිය පීරිස් යන මැතිතුමන්ලාට මගේ ස්තූතිය පුදකරනවා. එමෙන්ම පොත ගැන මාධ්‍ය තුළින් අදහස් දැක්වූ හා අදහස් පළකල සියලු දෙනාටත්, පොත පිළිබඳව මාධ්‍ය, සමාජය දැක්වූ කාරුණික සැලකිල්ලටත් විශේෂයෙන් මාගේ කෘතඥතාව පුදකර සිටිනවා.
මිනිස්සු හැටියට අපේ විශ්වාසයන්, ප්‍රතිපත්ති, අපි අදහන දේවල්වල ඉතිහාසය පුරාම වෙනස්කම් තිබුණා. මේ අතරින් ඇතිවන සාකච්ඡාවලින් එකඟතාවයන් ඇතිකර ගන්නට අපි උත්සාහ කළ යුතුයි. ඒ වෙනුවෙන් සමාජය තුළ මුලපිරීමක් ඇති කරන්න මා කරපු කතාවන් මෙහි ඇතුළත්ව තියෙනවා.
විවිධ මතවාද, අදහස් ගැන කරන සාකච්ඡාවලින් ඇති කරගන්නා වූ එකඟතාවයන් තුළින් රටක් ඉදිරියට ගෙනයන්නට පුළුවන්. ලෝකය ඉදිරියට ගෙනයන්නට පුළුවන්.
රටක් ඉදිරියට යන්න නම්, රටක වගකිවයුතු උදවිය රටේ හෘද සාක්ෂියට ඇහුම්කන් දිය යුතුයි. ලෝකය ඉදිරියට යනව නම් ලොව වගකිව යුතු උදවිය ලෝක ජනතාවගේ හෘද සාක්ෂියට ඇහුම්කන් දිය යුතුයි. ඒක ඉතාම වැදගත්.
රටේත්, ලෝකයේත් හෘද සාක්ෂිය අවබෝධ කර නොගෙන තමන්ගේ ආත්මාර්ථකාමී දේශපාලනික, ආගමික, වර්ගවාදී වශයෙන් බෙදුම්වාදී න්‍යායපත්‍රවල අනම්‍ය ලෙස එල්ලී සිටිමින්, ආත්මාර්ථකාමී ලෙස තම න්‍යාය පත්‍රයන් අනෙක් අය මත බලෙන් පැටවීමට යෑම තුළින් රටටත්, ලෝකයටත් සිදුවන අයහපත අපි ඉතිහාසය පුරා දකිමින් සිටිනවා. නිදහසින් පස්සේ ශ්‍රී ලංකාව භාෂා ගැටලු නිසා, ඉඩම් ප්‍රශ්න නිසා, සියලු ප්‍රශ්න දෙස ආගමික, වාර්ගික හා පංතිමය ඇසින් බලමින් බෙදුම්වාදී දේශපාලනයක් කිරීම නිසා හැම දශකයකදීම ගැටුම් ඇතිකරගෙන තිබෙනවා. මිනී මරාගෙන තිබෙනවා. ඒවාට අපි ජීවිතවලින්, දේපළවලින් වන්දි ගෙවලා තියෙනවා යැයි ද ඔහු කීය.
විශ්‍රාමික නීතිපති ජනාධිපති නීතිඥ පාලිත ප්‍රනාන්දු මහතා, විශ්‍රාමික ජනාධිපති ලේකම් ඔස්ටින් ප්‍රනාන්දු මහතා, ශ්‍රී ලංකා නීතිඥ සංගමයේ හිටපු සභාපති ජනාධිපති නීතිඥ සාලිය පීරිස් මහතා පොත පිළිබඳ කෙටි දෙසුම් පවත්වනු ලැබීය.
ඉම්තියාස් බාකීර් මාකාර් මහතාගේ පුත් ෆාදිල් බාකර් මාකාර් මහතා පිළිගැනීමේ කතාව පැවැත්වීය.
ධර්මසේන වැලිපිටිය
