විගණකාධිපතිවරයා ද තහවුරු කර ඇති රුපියල් මිලියන 16,000කට අධික කොවිඩ් එන්නත් වංචාව පිළිබඳව අල්ලස් කොමිසමට සහ අපරාධ පරීක්ෂණ දෙපාර්තමේන්තුවට කරන ලද පැමිණිලි සම්බන්ධයෙන් එම ආයතන මේ දක්වා කිසිදු විමර්ශනයක් කර නැතැයි වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානය චෝදනා කරයි.
කොවිඩ් වසංගත සමයේදී රටට අවශ්‍ය සිමාව ඉක්මවා කොවිඩ් මර්දන එන්නත් කුප්පි මිලදී ගෙන ඉන් එන්නත් කුප්පි ලක්ෂ 70ක් විනාශ කිරීමත් කුප්පි මිලියන 14ක් මිලදී ගැනීම සඳහා රුපියල් මිලියන 16,000කට අධික මුදලක් වැය කිරීමත් සම්බන්ධයෙන් පුළුල් විමර්ශනයක් පවත් වන ලෙස සිය පැමිණිල්ලෙන් ඉල්ලා සිටි බව එම සන්ධානයේ සභාපති, විශේෂඥ වෛද්‍ය චමල් සංජීව මහතා පවසයි.
කොවිඩ් මර්දන එන්නත් කුප්පියක් ඩොලර් පහකට මිලදී ගැනිීමට හැකියාව තිබියදී ඩොලර් දහය බැගින් ගෙවා මිලදී ගෙන ඇති බවත් මේ සම්බන්ධයෙන් පාර්ලිමේන්තුවේ ද කරුණු හෙළි වූ බවත් රාජ්‍ය ඖෂධ සංස්ථාවේ හිටපු සභාපතිවරයකු ඇතුළු කොවිඩ් කාර්යසාධක බළකායට චෝදනා එල්ල වූ බවත් වෛද්‍යවරයා සඳහන් කරයි.
මේ සම්බන්ධයෙන් අපරාධ පරීක්ෂණ දෙපාර්තමේන්තුවට සහ අල්ලස් කොමිසමට කීප වතාවක් පැමිණිලි කළ නමුත් එයට විමර්ශනයක් සිදු නොවීමත් අදාළ ලිපිගොනු නීතිපති දෙපාර්තමේන්තුවට භාරදීමට අසමත්වීමත් කනගාටුවට කරුණක් බව විශේෂඥ වෛද්‍ය චමල් සංජීව මහතා වැඩිදුරටත් කියා සිටී.
සුජීව තත්සර
