විපක්ෂ නායක සජිත් ප්‍රේමදාස එක්සත් ජාතින්ගේ මානව හිමිකම් පිළිබඳ
තානාපති වෝල්කර් ටර්ක් පාර්ලිමේන්තුවේදී හමුවීමෙන් අනතුරුව කියයි
රටේ මානව හිමිකම් සහ මූලික අයිතිවාසිකම් සම්බන්ධයෙන් මීට වඩා පුළුල් දැක්මකින් යුත් ව්‍යවස්ථා සංශෝධනයක් අවශ්‍යයැයි විපක්ෂ නායක සජිත් ප්‍රේමදාස මහතා පැවසීය. හෙතෙම මේ බව කියා සිටියේ එක්සත් ජාතින්ගේ මානව හිමිකම් පිළිබඳ තානාපති වෝල්කර් ටර්ක් මහතා පාර්ලිමේන්තුවේදී හමුවීමෙන් අනතුරුව මාධ්‍ය වෙත අදහස් දක්වමිනි.
එක්සත් ජාතින්ගේ මානව හිමිකම් පිළිබඳ තානාපති වෝල්කර් ටර්ක් මහතාගේ පැමිණීමත් සමග අප රටේ මානව හිමිකම් ක්ෂේත්‍රය ගැන සංවාදයක් ඇති වන තිබෙන බවත් ප්‍රජාතන්ත්‍රවාදී සමාජයක මානව හිමිකම් ආරක්ෂා කිරීම ඉතාම වැදගත් බවත් විශ්වීය මානව හිමිකම් ගැන ප්‍රකාශය, සිවිල් සහ දේශපාලන අයිතිවාසිකම් ගැන ප්‍රඥප්තිය, ආර්ථික සමාජීය අයිතීන් ආරක්ෂා කරන ප්‍රඥප්තිය, කාන්ත ළමා හා ආබාධිත අයගේ අයිතිය රැකීම, ජනවාර්ගික වශයෙන් වෙනස් නොකර සිටීම, හිංසනයෙන් බැහැර වීම හා පාරිසරික අයිතින් සුරැකීම ආදී ලොවම පිළිගත් මානව අයිතිවාසිකම් සුරක්ෂා කිරීම ප්‍රජාතන්ත්‍රවාදයේ සුවිශේෂ කරුණක් බවත් විපක්ෂ නායකවරයා පැවසීය.
අප රටේ මානව හිමිකම් සුරක්ෂා කරන්න අතුරුදන් වූවන්ගේ කාර්යාලය හානි පූර්ණ කාර්යාලය ජාතික සමගිය හා සංහිඳියාව උදෙසා නිර්මාණය වූ කාර්යාලය තුළින් පශ්චාත් යුද සමයේ සංහිඳියාව මිත්‍රශීලීත්වය එකමුතුභාවය සාක්ෂාත් කරන්න පියවර ගණනාවක් ගෙන ඇති බවත් ඔහු කීය.
එම නිසා බොහෝ දේශපාලන පක්ෂ එකඟ වන ත්‍රස්තවාදය වැළැක්වීමේ පනතේ තදබල පැහැදිලි වෙනසක් සිදුවිය යුතු බවත් සංශෝධනයක් වෙනුවෙන් සමගි ජන බලවේගය පෙනී සිටින බවත් එමෙන්ම මාර්ගගත ක්‍රමවල සුරක්ෂිතභාව සම්බන්ධ පනත හරහා අදහස් පළ කිරීමේ නිදහස සීමා වන බවත් මෙහිද වෙනසක් සිදුවිය යුතු බවත් ප්‍රජාතන්ත්‍රවාදය සුරක්ෂා කරන සිව්වැනි කුළුණ ලෙස නිදහස් මාධ්‍ය සුරක්ෂිත කළ යුතු බවත් සජිත් ප්‍රේමදාස මහතා පැවසීය.
මාධ්‍යවේදීන්ගේ මාධ්‍ය ආයතන නියාමන කරන්න විවිධ කොමිසන් පත් කරන්න රජය කටයුතු කරන්නේ නම් ඒවාට විපක්ෂය විරුද්ධ වන බවත් ඊට අමතරව අද වන විට මූලික හා මානව අයිතියක් වන ආර්ථික සමාජිය ආගමික අයිතිය මෙන්ම ජීවත් වීමේ අයිතියද තහවුරු කළ යුතු බවත් අද වන විට පවතින බඩු මිල එක්ක මිනිසුන්ගේ ජීවනෝපාය පවා කඩාකප්පල් වී ඇති බවත් ජීවත් වීමේ අයිතිය පවා පලු‍දු වෙමින් පවතින බවත් ආහාර හා ආහාර නොවන වියදම් සපුරා ගැනීමද ගැටලු‍වක් වී ඇති බවත් විපක්ෂ නායක වැඩිදුරටත් කීය.
බඩු මිල ශීඝ්‍රයෙන් ඉහළ යෑම නිසා අප රටේ ජනතාවගේ ජීවත් වීමේ අයිතිය පවා උල්ලංඝනය වන බවත් සිවිල් හා දේශපාලන අයිතිය රැකගැනීම මෙන්ම ජීවත් වීමේ මානව අයිතිය වෙනුවෙන් සමගි ජන බලවේගය පෙනී සිටින බවත් ආණ්ඩුක්‍රම ව්‍යවස්ථාවේ පැහැදිලි වෙනසක් සිදු වී මානව හා මූලික අයිතිවාසිකම් ගණයට අයත් දේවල් යටතට ජීවත් වීමේ අයිතිය අධ්‍යාපන සෞඛ්‍ය මෙන්ම ශක්ති සම්පන්න ජන ජීවිතයක් ලැබීමට අයිතිය තිබිය යුතු බවත් හෙතෙම පෙන්වා දුන්නේය.
