ඇමැති නලින්ද ජයතිස්ස
මැදපෙරදිග යුදමය තත්ත්වය හරහා ශ්‍රී ලංකාවට පැති කිහිපයකින් බලපෑම් ඇතිවිය හැකි බවත් ඒ අනුව ඇතැම් බලපෑම් සම්බන්ධයෙන් විකල්ප සොයාගත යුතු බවත් එසේම ඇතැම් බලපෑම්වල ආර්ථික හානිය අවම කරගත යුතු බවත් කැබිනට් මාධ්‍ය ප්‍රකාශක හා ජනමාධ්‍ය සහ සෞඛ්‍ය ඇමැති වෛi නලින්ද ජයතිස්ස මහතා පැවසීය.
කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදීන් විසින් අසන ලද ප්‍රශ්නවලට පිළිතුරු දෙමින් ඊයේ (25දා) මේ බව ප්‍රකාශ කළ ඇමැතිවරයා කියා සිටියේ විදේශ විනිමය ප්‍රේෂණවලට, ඉන්ධන මිල ගණන්වලට සහ තේ ඇතුළු ශ්‍රී ලංකාව විසින් අපනයනය කරන ද්‍රව්‍යවලට මේ යුදමය තත්ත්වය හරහා බලපෑම් ඇතිවිය හැකි බවය.
ශ්‍රී ලංකාව ආර්ථිකමය වශයෙන් හුස්මක් ගනිමින් සිටින අවස්ථාවක මෙවැනි යුද ගැටුම්කාරී තත්ත්වයක් වර්ධනය වීම ශ්‍රී ලංකාවට පාඩු සහ අවදානම්සහගත තත්ත්වයක් බවත් ඒ නිසා මේ තත්ත්වය රජය විසින් සමීපව අධ්‍යයනය කරමින් සිටින බවත් ඇමැතිවරයා සඳහන් කළේය.
කුඩා රටක් වුවත් අපේ ඉල්ලීම වන්නේ මේ යුද ගැටුම් නවත්වන ලෙසයි. රජය සිටින්නේ යුද්ධය හෙළා දකින යුද්ධය අනුමත නොකරන සහ ලෝක සාමය පවත්වා ගත යුතුයි යන ස්ථාවරයේ බවත්, මේ ගැටුම් හේතුවෙන් වඩාත්ම පීඩාවට පත් වන්නේ සාමාන්‍ය ජනයා බව ද ඇමැති නලින්ද ජයතිස්ස මහතා මාධ්‍යවේදීන්ගේ ප්‍රශ්නවලට පිළිතුරු දෙමින් තවදුරටත් ප්‍රකාශ කළේය.
ශ්‍යාම් නුවන් ගනේවත්ත
