හිටපු අමාත්‍යාංශ ලේකම්ගෙන් මුලින්ම ප්‍රකාශ ගනී
ඔස්ට්‍රේලියාවෙන් කිරිගවයන් ආනයනය කිරීමේදී සිදු වී ඇතැයි කියන රුපියල් බිලියන ගණනක මූල්‍ය වංචාව සම්බන්ධයෙන් විමර්ශන ආරම්භ කර ඇති අපරාධ පරීක්ෂණ දෙපාර්තමේන්තුව ඊට සම්බන්ධ වූ එවකට රාජ්‍ය නිලධාරීන්ගෙන් ප්‍රශ්න කර ප්‍රකාශ ලබාගැනීම ආරම්භ කර ඇත.
රාජ්‍ය නිලධාරීන්ගෙන් ප්‍රශ්න කර ප්‍රකාශ ලබාගැනීමෙන් අනතුරුව මෙම මහා මූල්‍ය වංචාවට සම්බන්ධ එවකට රජයේ සිටි ප්‍රබල දේශපාලනඥයන්ගෙන් ප්‍රශ්න කිරීමට බලාපොරොත්තු වන බවද අපරාධ පරීක්ෂණ දෙපාර්තමේන්තු ආරංචි මාර්ග කියා සිටියේය.
මෙම විමර්ශනයේ මුල් පියවර ලෙස හිටපු අමාත්‍යාංශ ලේකම් රේණුකා ඒකනායක මහත්මියගෙන් අපරාධ පරීක්ෂණ දෙපාර්තමේන්තුව පෙරේදා (23දා) ප්‍රශ්න කර ප්‍රකාශ ලබා ගත්තේය. රේණුකා ඒකනායක මහත්මිය හිටපු ජනාධිපති රනිල් වික්‍රමසිංහ මහතාගේ ලේකම් ලෙස කටයුතු කළ සමන් ඒකනායක මහතාගේ බිරිඳයි.
ඉකුත් 2012 වර්ෂයේ සිට 2017 වර්ෂය දක්වා වසර 05ක කාලසීමාව තුළදි ඔස්ට්‍රේලියාවෙන් මිල අධික වටිනාකමින් යුත් කිරි ගවයන් ආනයනය කිරීමේ වැඩපිළිවෙළක් ක්‍රියාත්මක විය. ඒ සඳහා රුපියල් බිලියන ගණනක මුදල් යොදවා තිබුණ ද එකදු කිරිගවයකු ආනයනය කර නොතිබුණු බව පසුව හෙළි විය.
මේ සම්බන්ධයෙන් අපරාධ පරීක්ෂණ දෙපාර්තමේන්තුව වෙත ලැබුණු පැමිණිල්ලකට අනුව පුළුල් විමර්ශනයක් මේ වනවිට ආරම්භ කර තිබේ.
හේමන්ත රන්දුණු
