මැදපෙරදිග යුද ගැටුම් හේතුවෙන් නියමිත දිනයේදී ඊශ්‍රායලයට පැමිණීමට නොහැකි වූ විදේශිකයන්ගේ නැවත පැමිණීමේ (Re-Enty) වීසා කාලය දීර්ඝ කිරීමට PIBA (පී. අයි. බී. ඒ.) ආයතනය කටයුතු කර ඇතැයි ඊශ්‍රායලයේ ශ්‍රී ලංකා තානාපති නිමල් බණ්ඩාර මහතා සඳහන් කරයි.
මේ සම්බන්ධයෙන් සියලු ගුවන් සේවාවලට දැනුම්දී ඇති බවත් ඊශ්‍රායලය වෙත පැමිණීමට ගුවන් යානා ගමන් ආරම්භ කළ පසු අවහිරයකින් තොරව ඔවුන්ට ඊශ්‍රායලය වෙත පැමිණීමට හැකි වන බවත් තානාපතිවරයා ඊයේ (24දා) පැවසීය.
එසේම ඉන්දීය රජය මගින් ක්‍රියාත්මක කර ඇති අම්මාන් ගුවන්තොටුපළේ සිට නවදිල්ලිය බලා පිටත්ව යෑමට නියමිත ගුවන් යානයේ ගමන් කිරීමට ශ්‍රී ලාංකිකයන් 17 දෙනකු මේ වනවිට ලියාපදිංචිව ඇතැයි ද එම ගුවන් යානය අද (25දා) පිටත්වීමට නියමිතව ඇතැයි ද හෙතෙම සඳහන් කළේය. මීට අමතරව ඊජිප්තුව හරහා ශ්‍රී ලංකාව බලා ගමන් කිරීමට ශ්‍රී ලාංකිකයන් 20 දෙනකු තානාපති කාර්යාලයේ ලියාපදිංචි වී සිටින බවත් මේ වනවිට ශ්‍රී ලංකාවට පුද්ගලයන් 05 දෙනකු පැමිණ ඇති බවත් ඊශ්‍රායලයේ ශ්‍රී ලංකා තානාපති නිමල් බණ්ඩාර මහතා වැඩිදුරටත් ප්‍රකාශ කර සිටියේය.
සුජීව තත්සර
