දෙමාපියන් අහිමි, ජීවත් වන නිවස තුළ නිසි රැකවරණය සහ ආරක්ෂාව නොමැති දරුවන් සඳහා මාසිකව රුපියල් පන්දහසක ජීවන වියදම් දීමනාවක් ලබාදීමට රජය තීරණය කර ඇත. දිවයින පුරා ළමා සංවර්ධන මධ්‍යස්ථාන 356ක ළමයි 9191දෙනෙක් පමණ
නේවාසිකව රැකවරණය ලබමින් සිටිති.
ආයතනික රැකවරණය හෝ භාරකාරත්වය යටතේ ජීවත් වන ළමුන් සහ වීදි ළමුන් සඳහා ජීවන වියදම් දීමනාවක් ලබාදීමට රජය රුපියල් මිලියන දහසක් 2025 වර්ෂයට ඉදිරිපත් කළ අයවැය මගින් වෙන් කර ඇත.
යෝජිත ජීවන වියදම් දීමනාවෙන් රුපියල් 3000ක් භාරකාරිත්වය යටතේ දරුවාගේ අධ්‍යාපන, සෞඛ්‍ය, අනෙකුත් සුබ සාධන වියදම් සඳහා ළමයා රැඳී සිටින සුබ සාධන මධ්‍යස්ථානයට හෝ භාරකාරත්වය දරන්නාටද, රුපියල් 2000ක් දරුවාගේ නමින් ඉතිරි කිරීමේ ගිණුමක මාසිකව තැන්පත් කිරීම ද කළ යුතුය. ජාතික ඉතිරි කිරීමේ බැංකුව මගින් මෙම ගනුදෙනුව සිදු කළ යුතුය.
දෙමාපියන් අහිමි වීම, භාරකාරත්වය අහිමි වීම, මව සහ පියා යන දෙදෙනාම හෝ ඉන් එක් අයකුගේ හෝ භාරකාරත්වය යටතේ සිටිය ද, ජීවත් වන නිවස තුළ නිසි රැකවරණය සහ ආරක්ෂාව නොමැති දරුවන්ට සහ අනාථ හා අත් හරිනු ලැබූ දරුවන්ට රැඳවුම් නිවාස/ළමා සංවර්ධන මධ්‍යස්ථාන තුළ රැකවරණය සලසයි.
යෝජිත ජීවන වියදම් දීමනාව තිරසරව හා ඵලදායීව පවත්වාගෙන යෑම සඳහා පසු විපරම් කිරීම කාන්තා හා ළමා කටයුතු අමාත්‍යාංශයේ ලේකම්වරයාගේ සභාපතිත්වයෙන් සහ අනෙකුත් අදාළ ආයතනවල නිලධාරීන්ගෙන් සමන්විත ජාතික මෙහෙයුම් කමිටුවක් පත් කිරීමට විෂය භාර ඇමැතිවරිය විසින් ඉදිරිපත් කරන ලද යෝජනාවට අමාත්‍ය මණ්ඩලය අනුමැතිය ලබාදී ඇත.
නිමල් ගුණතිලක
