ළමා සෞඛ්‍ය හා දරුවන් අතර පවතින විවිධ ගැටලු නිරාකරණය කරගැනීමට අවශ්‍ය පසුබිමට මුල් ළමාවියේදීම අඩිතාලම වැටිය යුතු බවත් නොඑසේ නම් කුඩා කාලයේදී පමණක් නොව එම ගැටලු දීර්ඝකාලීනව බලපාන බවත් කොළඹ විශ්වවිද්‍යාලයේ වෛද්‍ය පීඨයේ මහාචාර්ය රිජ්වේ ආර්යා ළමා රෝහලේ ළමා රෝග පිළිබඳ විශේෂඥ වෛද්‍ය පූජිත වික්‍රමසිංහ මහතා පැවැසීය.
පෙර පාසල් සෞඛ්‍ය ප්‍රවර්ධන වැඩසටහන මගින් නිර්මාණය කරන ලද සමාජ සහ චර්යාත්මක වෙනසක් ඔස්සේ ළමා ප්‍රවර්ධනය සඳහා උපයෝගි කරගන්නා සන්නිවේදන මෙවලම් ජනගත කිරීමෙන් අනතුරුව සෞඛ්‍ය ප්‍රවර්ධන කාර්යාංශයේ ඊයේ (19දා) පැවැති මාධ්‍ය හමුවට එක්වෙමින් ඒ මහතා මේ බව පැවැසීය. පෙර පාසල් දරුවන් අතර විශේෂයෙන් බලපාන ගැටලු වන්නේ දරුවන්ගේ පෝෂණ ගැටලු, මානසික සංවර්ධනය තුළින් ඇති වන ගැටලු මෙන්ම පචිත්‍රතාවය සහ මුඛ සෞඛ්‍ය පිළිබඳ ගැටලු බවද ඒ මහතා වැඩිදුරටත් පැවැසීය.
මෙහිදී විශේෂඥ වෛද්‍ය ප්‍රසාද් චතුරංගන, ප්‍රජා වෛද්‍ය විශේෂඥ ඉනෝකා වික්‍රමසිංහ, බස්නාහිර පළාත් අධ්‍යාපන දෙපාර්තමේන්තුවේ පූර්ව ළමාවිය සංවර්ධන සහ අධ්‍යාපන පිළිබඳ බස්නාහිර පළාත් අධ්‍යක්‍ෂ දුෂ්මන්ත රාජපක්‍ෂ, සෞඛ්‍ය ප්‍රවර්ධන කාර්යාංශයේ අධ්‍යක්‍ෂ ප්‍රජා වෛද්‍ය විශේෂඥ රංජිත් බටුවන්තුඩාව යන මහත්ම මහත්මීහු අදහස් දැක්වූහ.
පෙර පාසල් දරුවන් සීනි සහිත ආහාර නිර්දේශිත ප්‍රමාණයට වඩා වැඩිපුර ලබාගන්නා බවත් පෙර පාසල් දරුවන්ගෙන් සියයට හැටක් පමණ පැණි බීමට හුරුවී ඇති බවත් ප්‍රජා විශේෂඥ වෛද්‍ය ඉනෝකා වික්‍රමසිංහ මහත්මිය මෙහිදී පැවැසුවාය. ඔවුන්ගේ සෞඛ්‍යයට ඉතාමත් අහිතකර ලෙස බලපාන බවද ඇය කීවාය. එසේම සෑම දරුවකුටම දෛනිකව එළවළු වර්ග දෙකක් පලතුරු වර්ග දෙකක් කොළ මැල්ලුම් වර්ගයක් ලබාදීමට දෙමව්පියන් කටයුතු කළ යුතු බවත් අස්ථි පිටින් ආහාරයට ගත හැකි හාල්මැස්සා, පියාමැස්සා, හුරුල්ලා වැනි මත්ස්‍යය ආහාර, බිත්තර මෙන්ම කැල්සියම් අධික ආහාරයක් වන මුරුංගා වැනි පලාවර්ග ලබාදීමට කටයුතු කළ යුතු බවද වෛද්‍යවරිය පැවැසුවාය.
සුජාතා ජයරත්න
