දියණියන් දෙදෙනාට සහ බෑනාටත් ඇප
මුදල් විශුද්ධිකරණ චෝදනා යටතේ සිදුකරන විමර්ශනවල සැකකරුවන් ලෙස අත්අඩංගුවට ගත් හිටපු අමාත්‍ය කෙහෙළිය රඹුක්වැල්ල මහතාගේ දියණියන් දෙදෙනකු වන චවිත්‍රි ජයනිකා රඹුක්වැල්ල, අමලි නයණිකා රඹුක්වැල්ල සහ අමලි රඹුක්වැල්ල යන අයගේ ස්වාමි පුරුෂයා වන ඉසුරු පුලස්ති බණ්ඩාර පොල්ගස්දෙණිය යන තිදෙනා ඇප මත මුදාහැරීමට කොළඹ ප්‍රධාන මහෙස්ත්‍රාත් තනුජා ලක්මාලි ජයතුංග මහත්මිය ඊයේ (19දා) නියෝග කළාය.
රුපියල් 134,097,731.39 (රු. දහතුන් කෝටි හතළිස් ලක්‍ෂ අනූහත්දහස් හත්සිය තිස්එකයි ශත තිස් නවයක) වටිනාකමින් යුත් වත්කම්, රුපියල් 40,000,000 (රුපියල් මිලියන හතළිහක වටිනාකමින් යුත් මහල් නිවාස සහ
රු. 20,500,000 (රු. ලක්‍ෂ දෙසිය පහක) වටිනාකමින් යුත් බෙන්ස් වර්ගයේ මෝටර් රථයකට අදාළව සිදුකරන විමර්ශන සඳහා ප්‍රකාශ සටහන් කොට ඔවුන් අත්අඩංගුවට ගෙන තිබිණි. එකී විමර්ශනවලට අදාළව මේ වනවිටත් ස්ථාවර තැන්පතු ගිණුම් සහ ජීවිත රක්‍ෂණ ආයෝජන සැලසුම් 40 කට ආසන්න ප්‍රමාණයක් මහාධිකරණ නියෝග අනුව අත්හිටුවා තිබිණි. එම විමර්ශනවලට අදාළව අත්අඩංගුවට ගෙන පෙරේදා (18දා) අධිකරණයට ඉදිරිපත් කිරීමෙන් අනතුරුව ඇප මත මුදාහළ නමුත් ඇප කොන්දේසි සපුරාලීමට නොහැකිවීම නිසා බන්ධනාගාර නිලධාරීන් විසින් රක්‍ෂිත බන්ධනාගාරයට ගෙන ගොස් තිබූ කෙහෙළිය රඹුක්වැල්ල හා ඔහුගේ බිරිඳ ඇතුළු තිදෙනා ද ඊයේ (19දා) ඇප කොන්දේසි සපුරාලීම නිසා මුදාහැරීමට බන්ධනාගාර නිලධාරීන් පියවර ගෙන තිබිණි.
රුපියල් 50,000 බැගින් මුදල් ඇප හා රුපියල් මිලියන 02 බැගින් වූ ශරීර ඇප තුන බැගින් වූ ශරීර ඇප මත එම සැකකරුවන් මුදාහැර තිබිණි. එම සැකකරුවන්ගේ විදේශ ගමන් වළක්වමින් අධිකරණය තහනම් නියෝගයක් ද නිකුත් කළේය.
ඒ.ජේ.ඒ. අබේනායක
