දේශීය සංචාරක සේවා සපයන්නන්ගේ ධාරිතාව ඉහළ නංවමින්, ග්‍රාමීය සංචාරක ආකර්ෂණය ඉලක්ක කරගත් සංචාරක සංවර්ධනයක් වෙනුවෙන් රජය කටයුතු කරන බව අග්‍රාමාත්‍ය ආචාර්ය හරිනි අමරසූරිය පැවසුවාය. සේද මාවතේ ඒකාබද්ධතාවය සහ ජයග්‍රාහී සහයෝගීතාවය යන තේමාවෙන් ජුනි 16 වැනි දින කොළඹ සිනමන් ලයිෆ් හෝටලයේ පැවති චීන -ශ්‍රී ලංකා- මාලදිවයින සංචාරක සංසදයේ සමාරම්භක අවස්ථාවට සහභාගී වෙමින් අග්‍රාමාත්‍යවරිය මේ බව සඳහන් කර සිටියාය.
සතියක් පුරා පැවති චීන- ශ්‍රී ලංකා- මාලදිවයින් සංචාරක සංසදය පෙරේදා කොළඹදී ආරම්භ වූ අතර, සංචාරක හා ගුවන් සේවා අංශවල නිලධාරීන්, නියෝජිතයින්, විශේෂඥයින් සහ විද්වතුන් ඇතුළු 100 කට අධික පිරිසක් සහභාගී වූහ. සමාරම්භක උත්සවය අතරතුර ‘සේද මාවතේ නගර පිළිබඳ ජාත්‍යන්තර සංචාරක සන්ධානය මගින් චීනය, ශ්‍රී ලංකාව සහ මාලදිවයින අතර සංචාරක හුවමාරු සහ සහයෝගීතාව වැඩි දියුණු කිරීම සඳහා ඒකාබද්ධ ක්‍රියාකාරකම්’ රැසක් දියත් කරන ලදී.
මෙහිදී වැඩිදුරටත් අදහස් දැක් වූ අග්‍රාමාත්‍යතුමිය මෙසේද පැවසුවාය.
මෙම සමුළුවේ මූලික දැක්ම වෙන්නේ, සංචාරක කර්මාන්තය ආර්ථික වර්ධනය පමණක් නොව, ජනතාව අතර සබඳතා, සංස්කෘතික අවබෝධය සහ කලාපීය සහයෝගීතාවය සහිත දකුණු ආසියානු කලාපයක් ගොඩනැගීමයි. චීනය ඔවුන්ගේ විශාල හා විවිධත්වයෙන් යුතු භූ දර්ශන, සියවස් ගණනාවක් පැරණි පෞරාණික ස්ථාන සහ එකිකෙට වෙනස් නවීන නගර සමඟ මිලියන සංඛ්‍යාත සංචාරකයින් ආකර්ෂණය කරගන්නවා.මාලදිවයින, පිරිසිදු කොරල්පර, සුපැහැදිලි ජලය සහ ලෝක ප්‍රකට නිවාඩු නිකේතන සමඟින් නිවර්තන දූපත් නියෝජනය කරනවා. ශ්‍රී ලංකාව, අනුරාධපුර පූජනීය නගරයේ සිට සීගිරිය බලකොටුව දක්වාත්, දකුණේ රන්වන් වෙරළ තීරයේ සිට මධ්‍යම කඳුකරයේ මීදුමෙන් වැසුණු තේ වතු දක්වාත් අද්විතීය අත්දැකීම් සමූහයක් ලබා දෙනවා.
අපේ රටේ, ආදායම් උත්පාදනය පමණක් නොව, අපගේ පරිසර පද්ධති ආරක්ෂා කරන, අපගේ සංස්කෘතීන් අගයන සහ අපගේ ජනතාව සවිබල ගන්වන සංචාරක කර්මාන්තයක් ගොඩනගන්නේ කෙසේද යන්න පිළිබඳව මේ වනවිට රජය අවධානය යොමු කර තිබෙනවා.එහිදී කලාපීය සහයෝගීතාවය ශ්‍රී ලංකාවට ඉතා වැදගත්. වීසා ක්‍රියාවලිය පහසු කිරීමට, සෞඛ්‍ය හා ආරක්ෂක ප්‍රමිතීන් පෙළගැස්වීමට, ඒකාබද්ධ අලෙවිකරණ ව්‍යාපාර සංවර්ධනය කිරීමට සහ ජාත්‍යන්තර ආයෝජන ආකර්ෂණය කරගැනීම සඳහා පොදු වේදිකා මේ ඔස්සේ නිර්මාණය කළ හැකියි.සංචාරක කර්මාන්තය ග්‍රාමීය ප්‍රජාවන් වෙත ළඟා වන, කාන්තා ව්‍යවසායකයින්ට සහාය වන සහ තරුණ සහභාගීත්වය දිරිමත් කරන සංචාරක කර්මාන්තයක් බවට පත් කිරීමයි අපේ අරමුණ.ඒ වගේම පාරිසරික සංචාරක ව්‍යාපාරය ප්‍රවර්ධනය කිරීමට, ඩිජිටල් සංචාරක යටිතල පහසුකම් වැඩිදියුණු කිරීමට සහ දේශීය සංචාරක සේවා සපයන්නන්ගේ ධාරිතාව ඉහළ නැංවීමට දැනටමත් රජය කටයුතු කරමින් සිටිනවා. විශේෂයෙන්ම රටේ අඩු නියෝජනයක් ඇති ප්‍රදේශවලට සංචාරක ව්‍යාපාරයේ ප්‍රතිලාභ ලැබීම සහතික කරන, ප්‍රජා පාදක සංචාරක කර්මාන්තයක් ඇති කිරීම පිළිබඳවත් රජයේ අවධානය යොමු වී තිබෙනවා. චීනයේ නවෝත්පාදනයන් සමඟ එක්ව කටයුතු කළහොත් අපේ රටේ සංචාරක ක්ෂේත්‍රය ඉහළ මට්ටමින් ප්‍රවර්ධනය කරන්න පුලු‍වන්. සංචාරක ව්‍යාපාරයේ සැබෑ වටිනාකම ආර්ථික ප්‍රතිලාභවලින් පමණක් නෙමෙයි මානව සබඳතා පෝෂණය කිරීමේ හැකියාවන් මතද පවතින බව මතක තබාගත යුතුයි. ඒකාකාර ආකෘති බිඳ දැමීමට, සංවේදනය පෝෂණය කිරීමට සහ සාමය ගොඩනැගීමට මේ මඟින් අපිට හැකි වෙනවා. බෙදී ගිය ලෝකයක, සංචාරක ව්‍යාපාරය, දේශ සීමා හරහා, සංස්කෘතීන් හරහා සහ පරම්පරා හරහා එක්සත් කිරීමට අවසථා නිර්මාණය කරනවා.
ශ්‍රී ලංකාවේ මහජන චීන සමූහාණ්ඩුවේ තානාපති කී. සෙන්හොංග් මහතා මෙහිදී අදහස් දක්වමින් චීනය ශ්‍රී ලංකාවේ සංචාරක ව්‍යාපාරය වැඩිදියුණු කිරීම වෙනුවෙන් උපරිම සහය ලබාදෙන බව සඳහන් කර සිටියේය. චීනය, ශ්‍රී ලංකාව සහ මාලදිවයින අතර සංචාරක සහයෝගීතාවය හුදෙක් සරල එකතුවක් නොවන බවත් හෙතම පැවසීය. මාලදිවයින සහ ශ්‍රී ලංකාව සඳහා, සංචාරක ව්‍යාපාරය තීරණාත්මක වැදගත්කමක් උසුලන බවත් “එක් තීරයක් සහ මාර්ගයක්” රාමුව යටතේ සංචාරක සබඳතා තවදුරටත් ශක්තිමත් වන බවත් තානාපතිවරයා අවධාරණය කර සිටියේය.
ශ්‍රී ලංකාවේ චීන තානාපති කාර්යාලයේ සහ මාලදිවයින් තානාපති කාර්යාලයේ ප්‍රධානීන්ද චීන සංචාරක අමාත්‍යාංශයේ නියෝජිත පිරිසක්ද ඇතුළු ආරාධිත අමුත්තන්ද මෙම සමාරම්භක උත්සවයට සහභාගී වූහ.
චතුර පමුණුව
