මුදල් පසුම්බි තුනකුත් සමග සැකකරු පොලිස් දැලේ
කොළඹ මහ නගර සභාවේ නගරාධිපති තෝරා පත්කර ගැනීමට ඊයේ (16දා) නගර සභා පරිශ්‍රයේ ඡන්දය පැවැත්වෙමින් තිබියදී නගර සභා සේවකයකු ඇතුළු පුද්ගලයන් තිදෙනකුගේ මුදල් පසුබ්මි පරිශ්‍රය තුළදීම සොරකම් කළ පුද්ගලයකු එහි පැමිණ සිටි පිරිස එක්ව අල්ලාගෙන පොලිස් නිලධාරීන් වෙත භාරදෙනු ලැබීය.
නව නගරාධිපතිනිය ලෙස ව්‍රායි කැලී බල්තසාර් මහත්මිය ජයග්‍රහණය කිරීමෙන් පසු රැස්ව සිටි පිරිස ඇයගේ ජයග්‍රහණය වෙනුවෙන් ජයඝෝෂා නගමින් නගර සභා පරිශ්‍රය තුළ එක් රැස්වී තෙරපෙමින් වෙමින් සිටියදී මෙම පුද්ගලයා විසින් මුදල් පසුම්බි සොරාගෙන තිබේ.
සැකකරු නගර සභා සේවකයාගේ මුදල් පසුම්බිය කලිසමේ පිටුපස සාක්කුවෙන් සොරාගෙන දුව යමින් සිටියදී ඔහුගේ දැනුම්දීම මත රැස්ව සිටි පිරිස සැකකරු අල්ලාගෙන නගර සභා පරිශ්‍රයේ ආරක්‍ෂාවට පැමිණ සිටි පොලිස් නිලධාරීන්ට භාර දුන්හ. පොලිස් නිලධාරීන් ඔහු පරික්‍ෂා කිරීමේදී සොරාගත් මුදල් පසුබ්මි තුනක් පමණ එම අවස්ථාවේදීම සොයාගෙන තිබිණි. වැඩිදුර පරීක්‍ෂා කිරීම සඳහා සැකකරු වෙනත් ස්ථානයකට රැගෙන යෑමට පොලිස් නිලධාරීන් කටයුතු කරන අයුරු දක්නට ලදී.
මොහු සමග තවත් ගැටකපන්නන් කිහිප දෙනකු ද පැමිණෙන්නට ඇතැයි පොලිසිය සැකකරයි. පොලිස් භාරයට ගත් පුද්ගලයා කුරුඳුවත්ත පොලිසියට රැගෙන ගොස් තවදුරටත් විමර්ශන කළ යුතු බව පොලිස් නිලධාරියෙක් පැවැසීය.
චමින්ද සිල්වා
