ඊශ්‍රායලයෙන් ඉරානයේ
න්‍යෂ්ටික පහසුකම්වලට ප්‍රහාර
ඊශ්‍රායල-ඉරාන යුද්ධය ඊයේ (18) හයවැනි දිනට එළඹෙද්දී ඊශ්‍රායල ගුවන් ප්‍රහාරයන් හේතුවෙන් ඉරානයේ ටෙහෙරාන් අගනුවර හා ඒ අවට ප්‍රදේශවලින් පිපිරුම් ශබ්ද නිකුත් වූ බව විදෙස් මාධ්‍ය විසින් වාර්තා කර තිබේ. ඊයේ උදෑසන ඊශ්‍රායල ගුවන් හමුදා ප්‍රහාරයන් ඉරානයේ පිහිටි ප්‍රධාන පෙළේ මිසයිල නිෂ්පාදන කම්හලක් හා අධ්‍යාපන ඇකඩමියක් වෙත එල්ල කර තිබූ අතර ඊශ්‍රායල ප්‍රහාරක ජෙට් යානා 50කට අධික සංඛ්‍යාවක් පෙරේදා (17) ඉරානයේ හමුදා යටිතල පහසුකමකට ප්‍රහාර එල්ල කර තිබේ. එම ප්‍රහාරයෙන් ඉරාන හමුදාවන් සතු බලාගාරවලට ඉන්ධන සැපයීම හා න්‍යෂ්ටික ආයුධ නිපදවීම සඳහා යොදා ගන්නා යුරේනියම් හෙක්සෆ්ලොරයිඩ් වායුව සපයන යන්ත්‍රවලට ද හානි සිදුව ඇති බව වාර්තා වේ.
ඊශ්‍රයාලය විසින් මෙම ප්‍රහාරයන් එල්ල කිරීමට පැය කිහිපයකට පෙර ටෙහෙරාන් නගරයේ හමුදා ගොඩනැගිලි හා නිවාස ගොඩනැගිලි තිබෙන එයිටින් නමැති දිස්ත්‍රික්කයේ වැසියන්ට සිය නිවෙස්වලින් ඉවත්ව යන ලෙස දැනුම් දීමක් කර තිබිණි. ඊශ්‍රායල ප්‍රහාරවලට ප්‍රතිප්‍රහාර වශයෙන් ඉරානය ද ඊශ්‍රායලයේ ටෙල් අවිව්, ජෙරුසෙලම හා හයිපා යන නගර වෙත නවීන මෙන්ම මාරාන්තික හයිපර් සොනික් ෆාටා – 1 මිසයිල මෙන්ම බැලස්ටික් මිසයිල හා ඩ්‍රෝන යානා ප්‍රහාරයන් එල්ල කළ බව වාර්තා වේ. කෙසේ වුවද ඉරාන හමුදා ප්‍රහාරවලින් කිසිවකුටත් හානි සිදු වූ බවට වාර්තා වී නොමැත. ඉරාන මිසයිල ප්‍රහාරයන් හේතුවෙන් ටෙල් අවිව් නගරයේ වෙසෙන ඊශ්‍රායල වැසියන් පසුගිය දිනවල් පුරා පොළව යට පිහිටි බංකරවල කාලය ගත කර තිබිණි. ඉරාන විප්ලවීය හමුදාව පවසනුයේ ඊශ්‍රායලය වෙත එල්ල කරන ප්‍රහාරයන් අවශ්‍යතාවය පවතින තෙක් දිගටම සිදු කරන බවයි. මේ අතර එම හමුදාව විසින් නිවේදනය කර ඇත්තේ සිය හමුදාව ඊශ්‍රායලය වෙත හයිපර් සොනික් මිසයිලවලින් පහර දීමෙන් ඊශ්‍රායලයේ අනුග්‍රාහකයා වන ඇමරිකාවට පණිවිඩයක් යවා ඇති බවයි.
සංස්කරණය – ඒමන්ති මාරඹේ
