බ්‍රීතාන්‍ය විදේශීය ඔත්තු සේවය වන එම්අයි.6 සිය වසර 116ක ඉතිහාසය තුළ ප්‍රථම වතාවට කාන්තාවකට ප්‍රධානී තනතුර පිරිනමා තිබේ.
බ්‍රීතාන්‍ය විදේශීය රහස් ඔත්තු සේවයට 1999 වසරේදී සම්බන්ධ වූ බ්ලේස් මෙට්‍රවේලි එම සංවිධානයේ ප්‍රධානි ධුරයට පත්වූ 18 වැනියා වනු ඇත. මෙම වසර අග වත්මන් ප්‍රධානියා වන ශ්‍රීමත් රිචඩ් මුවර් එම ධුරයෙන් නික්ම යෑමෙන් අනතුරුව ඇය වැඩ භාර ගැනීමට නියමිතය.
ඇය දැනට බ්‍රීතාන්‍යයේ විදේශීය රහස් ඔත්තු සේවයේ තාක්ෂණය සහ නවෝත්පාදන අංශයේ වගකීම් භාරව සිටින අතර රහස් ඔත්තු සේවයට නායකත්වය දීමට කෙරුණු ඉල්ලීම තමන්ට ‘ආඩම්බරයක් සහ ගෞරවයක්’ බව පැවසුවාය.
“අපගේ ඔත්තු සේවය අන්කවරදාටත් වඩා වැදගත් අවස්ථාවක මෙම පත්වීම ඓතිහාසික අවස්ථාවක්” ලෙස බ්‍රීතාන්‍ය අග්‍රාමාත්‍ය ශ්‍රීමත් කියර් ස්ටාර්මර් හැඳින්වීය.
චතුර පමුණුව
