නිවේදිකාව දිවගොස් පණ බේරාගනී
ඊශ්‍රායලය හා ඉරානය අතර හටගෙන ඇති යුද්ධය මධ්‍යයේ ඊශ්‍රායල හමුදා විසින් ඉරානයේ ටෙහෙරාන් අගනුවර පිහිටි ඉරාන රජයේ රූපවාහිනි සංස්ථා මූලස්ථානය වෙත එල්ල කරන ලද ගුවන් ප්‍රහාරයකින් සජීවී විකාශනයක නිරතව සිටි රූපවාහිනි සේවකයන් තිදෙනෙකු මියගොස් ඇති අතර තවත් පිරිසක් තුවාල ලබා රෝහල්ගත කර ඇති බව ඉරාන රජයේ රූපවාහිනිය විසින් නිවේදනය කර තිබේ. එම අවස්ථාවේ වැඩ සටහන මෙහෙයවූ නිවේදිකාව දිවගොස් පන බේරාගෙන තිබේ. පෙරේදා (16) එල්ල කර ඇති ඊශ්‍රායල ගුවන් ප්‍රහාරයක් හේතුවෙන් රූපවාහිනී සංස්ථාවේ සේවය කරන සේවකයන් තිදෙනකු මිය ගිය බව පැවසුව ද කොපමණ පිරිසක් එම ප්‍රහාරයෙන් තුවාල ලබා ඇත්දැයි යන්න රූපවාහිනී බලධාරීන් විසින් ප්‍රකශ කර නොමැත. මෙම ප්‍රහාරය සම්බන්ධයෙන් නිවේදනයක් නිකුත් කර ඇති ඊශ්‍රායලය පවසා ඇත්තේ ඉරාන රජය සතු සන්නිවේදන මධ්‍යස්ථානයකට සිය හමුදාවන් පහර දුන් බවයි. මෙම ප්‍රහාරය සම්බන්ධයෙන් ප්‍රකාශයක් සිදු කර ඇති ඉරාන රජය එම ප්‍රහාරය යුද අපරාධයක් යැයි සඳහන් කර තිබේ. මේ අතර ඉරානයේ ටෙහෙරාන් අගනුවර වැසියන් දහස් ගණනින් ඊශ්‍රායල ප්‍රහාර හමුවේ නගරයෙන් පලා යමින් සිටින බවත් ටෙහෙරාන් නගරයේ මාර්ගවල මේ නිසා දැඩි වාහන තදබදයක් නිර්මාණය වී ඇති බව විදෙස් මාධ්‍ය පවසයි.
ඊශ්‍රායල – ඉරාන යුද්ධය ඉකුත් සිකුරාදා දිනයේ ඊශ්‍රායලය විසින් ඉරානයේ න්‍යෂ්ටික හා යුද – මිසයිල පහසුකම් 100කට අධික සංඛ්‍යාවක් ඉලක්ක කරගෙන එල්ල කරන ලද ප්‍රහාරයන් හේතුවෙන් ආරම්භ විය. මෙම ප්‍රහාරයන්ට ප්‍රතිප්‍රහාර වශයෙන් ඉරානය ද ඊශ්‍රායලයට ඩ්‍රෝන යානා හා මිසයිල ප්‍රහාර එල්ල කර ඇති අතර එතැන් සිට දෙරට විසින් එකිනෙකාට එරෙහිව දිගටම ප්‍රහාරයන් එල්ල කරමින් සිටිති.
