පුද්ගල චරිත ගැන ලිවීම, ඉතා සංකීර්ණ සංස්කෘතික රාමුවකින් වට වූ අපේ රටේ අසීරු කාර්යයකි. ඒ මන්දයත් සත්‍ය සොයා ගැනීම, ඇත්ත ඇති සැටියෙන්ම ප්‍රකාශ කිරීමට ඇති සභ්‍යත්ව බිය නිසාවෙනි. හසිත කුරුප්පු මාධ්‍යවේදියා ලියා ඇති ‘දිනූ මිනිසකුට සෙවණැල්ලක්ව’ නම් කෘතිය තුළ ද සියල්ල නොවලහා සපයා ගැනීමේ අසීරුතාවට ඔහු මුහුණ දුන් අභියෝගය මොනවට පිළිබිඹු වෙයි. මෙරට කීර්තිධර මිනිසුන් රැසකගේ බිරින්දෑවරුන් සමග කළ පිළිසඳර එකතුවක් මෙම ග්‍රන්ථයට ප්‍රස්තුත වී ඇත්තේය.
බිරිඳකගෙන් ඇගේ සැමියා පිළිබඳ තොරතුරු විමසීමේදී මාධ්‍යකරුවා තුළ කවරාකාරයක සංවිභාගශීලී ගුණයක් මතුවිය යුත්තේද? සැමියා පිළිබඳ බිරියගෙන් ප්‍රශ්න කිරීම දැලි පිහියෙන් කිරි කෑමක් වන්නේය. හසිත මේ අභියෝගය බොහෝදුරට ජයගෙන ඇත. මේ ලිපි මාලාව සඳහා හසිත තෝරාගෙන තිබුණේ කවර හෝ ක්ෂේත්‍රයක දැවැන්ත ප්‍රතිරූපයන්ය. සාර්ථක වූ මිනිසුන්ය. ‘සෑම සාර්ථක මිනිසකු පිටුපසම දිරිමත් ගැහැනියක් සිටී’ යන ප්‍රස්ථාව හසිත මේ ලිපි මාලව සඳහා තේමා කරගත් බවෙකි. කෙසේ වෙතත් තම ස්වාමිපුරුෂයන්ගේ ඇති තතු නොවලහා කියූ සහ නොකියූ තැන් බොහෝය.
ජාත්‍යන්තරය දිනූ මහා සූපවේදී පබිලිස් සිල්වාගේ බිරිඳ විමලාගේ මේ ප්‍රකාශය බලන්න. මහා හෝටලයේ අතිශය ප්‍රණීත රසමසවුළු පිසින පබිලිස් නිවසේ දී කොතරම් රසට ආහාර පිසිනවා ඇතිද? එය සුපිරි විය යුතුය. නමුත් විමලා මෙසේ කියන්නීය.
“පබිලිස් කවදාවත් ගෙදර දී උයලා නැහැ. සූපවේදියෙක් වුණාට පස්සෙවත් ගෙදර උයලා නැහැ. ඔහුට ඒකට වෙලාවකුත් නැහැ. පාන්දරින්ම ගෙදරින් ගියාම ඔහු ආපසු එන්නේ රෑ වෙලා. මම ඔහුගෙන් උයන්න ඉගෙන ගත්තෙත් නැහැ. මම උයන්නේ මට පුරුදු මගේ ක්‍රමයට.”
අතිශය සුන්දර වූ හෙළිදරව්වකි. අප සැම සිතා සිටියේ පබිලිස් උයන ගෙදර කෑම වේලක අරුමය පිළිබඳවය.
විවාහ දිවියක සාම්ප්‍රදායික නැන්දම්මා – ලේලි විරසකය පරසිඳුය. විවාහ වී කලක් ගතවනතුරු ලේලියට දරු සම්පතක් නොමැතිවීම නැන්දම්මා කෙසේ ඉවසන්නද?
සාම්ප්‍රදායික විරසකයෙන් විතැන් වූ ජනාදරයට පත් ගායක චාමර රණවකගේ බිරිඳ ඉවෝෂා ගුණවර්ධන ලේඛකයාට මෙසේ පවසන්නීය.
“දරුවෙක් ලැබෙන්න ප්‍රමාද වෙන එක ගැන චාමරගේ අම්මා කවදාවත්ම වචනයකින්වත්, බැල්මකින්වත් මගේ හිත රිද්දලා නැහැ. දරුවෙක් ලැබෙන්න පරක්කු වෙද්දී කොළඹ පෞද්ගලික රෝහලකින් මම සෑහෙන්න ප්‍රතිකාර කළා. ඒ දවස්වල අපට වාහනයකුත් නැහැ. මතුගම ඉඳලා බස් එකෙන් ආවේ. හයිවේ තිබුණෙත් නෑ. ඔය ගමනට මාත් එක්ක හැමදාම කොළඹ ආවේ නැන්දම්මා.”
අවි අමෝරා ගත් නැන්දම්මා – ලේලි අරගලකාරියන්ට ඇස් ඇරවන මුෂ්ටි ප්‍රහාරයකි. හසිතගේ ප්‍රශ්න කිරීම් හමුවේ ඉවෝෂාට නිහඬව සිටීමට හැකි වී නැත.
‘දිනූ මිනිසකුට සෙවණැල්ලක්ව’ ග්‍රන්ථයේ බිරිඳක ලෙසින් සමස්ත කාන්තා පරපුරේම දෑස් විවර කරවන නොවලහා හෙළිදරව් විශිෂ්ට ලෙසට කර ඇති සුවිශේෂී ලිපි දෙකකි.
පළමුවැන්න ජනාදරයේ අගතැන්පත් ජිප්සීස් නායක සුනිල් පෙරේරාගේ ප්‍රිය බිරිඳ ගීතා පෙරේරාගේය. දෙවැන්න ව්‍යාපාර නායක රොහාන් ප්‍රනාන්දුගේ බිරිඳ ප්‍රකට ව්‍යවසායිකා වරුණි අමුණුගමගේය. ඉවසීම, අවබෝධය සහ උන්නතිගාමී අභියෝග ජය ගැනීම පිළිබඳ කාන්තා පරපුර කියවිය යුතුම ලිපි ද්විත්වයකි.
මේ සටහන ලිවීමේ දී මෙම පොත විසි තිස් වාරයක්ම එහා මෙහා පෙරළෑමට සිදුවිය. එසේ වූයේ මේ පොතට පටුනක් නොමැති වීමේ දුර්වලතාව නිසාවෙනි. මෙවන් චරිත කතා පොතකට චරිතයකට බෙදුනු පටුනක් තිබිය යුත්තේමය. දෙවැනි මුද්‍රණයේ දී හෝ එම වරද නිවැරදි කිරීමට හසිත උනන්දු විය යුතුය.
අනුර බණ්ඩාර රාජගුරු
