මෙම සතියේ සුබ නැකැත් සුබ කටයුතු සඳහා යොදා ගැනීමේදී ඔබගේ කාර්ය වඩාත් සාර්ථක කර ගැනීමට නම් ඔබගේ අවශ්‍යතාවය අනුව ජ්‍යොතිෂවේදී මහතකුගේ උපදෙස් ලබාගැනීම වඩා සුදුසුය.
ජූලි 02 වන බදාදා පස්වරු 12.03 දක්වා සුබයි. උත්‍රපල් නැකත හා අටවිසි මහා යෝග අතර ප්‍රවර්ධමා යෝගය යෙදී ඇත. බෙරණ, පුවපල්, පුවසල, රෙහෙණ, හත, සුවණ, මුවසිරස, සිත, දෙනට, පුනාවස විසා, පුවපුටුප,අස්ලිස, දෙට,රේවතී යන නැකැත් හිමියන්ට වගා කටයුතු, වෙදකම්, වෙළෙඳ ව්‍යාපාර කටයුතු, රථ වාහන සම්බන්ධ කටයුතු, මූල්‍ය කටයුතු, ගිවිසුම් අත්සන් කිරීම, රැකියා භාර ගැනීම්, ආගමික කටයුතු හා කුඩා දරුවන්ගේ සියලු කටයුතු සඳහා සුබ නැකැත් මෙදින සාදා ගත හැකිය. මෙදින පෙරවරු 6.00 සිට 6.23 දක්වා බොහෝ සුබ කටයුතුවලට යොදා ගතහැකි අතිවිශිෂ්ට තත්කාල ග්‍රහ බලයක් පවතී. විශේෂයෙන් වෙළෙඳ ව්‍යාපාර ආරම්භ කිරීම වැනි ආර්ථික ප්‍රතිලාභ අපේක්ෂාවෙන් කරන කටයුතු, කුඩා දරුවන්ගේ අකුරු කියවීමේ කටයුතු සඳහා මෙම වෙලාව බෙහෙවින් ප්‍රශස්ත වේ. සුබ දිශාව දකුණය.
ජූලි 02 දින පස්වරු 12.03න් පසු මධ්‍යම රාත්‍රිය දක්වාම ත්‍රිපුෂ්කර යෝගය නම් ඉතා බලවත් යෝගයක් යෙදේ. මෙම යෝගය යෙදී ඇතිවිට දියුණුව හෝ විනාශය යන දෙකම තුන් ගුණයකින් ලැබේ. එම නිසා මෙම දින වගා කටයුතු සඳහා යොදා ගැනීමට ඉතා සුදුසුය. ත්‍රිපුෂ්කර යෝගය ඇති දිනවල වගා කිරීමෙන් අස්වැන්න තුන් ගුණයකින් වැඩි වේ. එබැවින් ඉහත නැකැත් හිමියන්ගේ වගා කටයුතු මෙම යෝගයෙන් ආරම්භ කළ හැකිය. එමෙන්ම මෙම යෝගය ඇති කාලය තුළ සිංහකරණය ද යෙදී ඇති බැවින් වගා කටයුතු සඳහා ඉතාම ප්‍රශස්ත වේ. සුබ දිශාව උතුරය. මෙම සිංහකරණය ජූලි 03 වන බ්‍රහස්පතින්දා පස්වරු 2.10 දක්වාම පවතී. ගෙඩි, මල්, කරල්, කොළ, මුල්වලින් ප්‍රයෝජන ගන්නා බෝග සහ අල වර්ග රෝපණය කිරීමට මෙම දින ඉතාම සුදුසුය.
ජ්‍යොතිර්වේදී,වාස්තුවිද්‍යා උපදේශක,
දේශමාන්‍ය ආචාර්ය – කපිල ඉන්ද්‍රික ගුණදාස.
මාලිබොඩ- දැරණියගල.
076 824 8000
